Ажалша хүнэй амжалтанууд

Буряад Уласай Тарбагатайн аймагта ажаһуудаг Валерий Чебан арбан жэлэй урда хүдөөдэ өөрын багахан ажахы байгуулжа, 30 гектар газар үйлэдбэрилжэ эхилһэн юм. Мүнөө Валерий Чебан хүл дээрээ гаража, 2300 гектарһаа жэл бүхэндэ хоёр мянган тонноһоо үлүү таряа хуряажа абана. 2020 ондо тус ажахы орооһото ургамалнуудай үрэһэнэй амбаар байгуулжа, хилээмэ барижа эхилхэ түсэбтэй. 

Ажалаа түрүүн эхилхэдээ, бэрхэшээлтэй ушарбашье, хамсыгаа шамажа, эсэхэеэшье ойлгонгүй хүдэлөөбди. Мүнөө хилээмэ барилгын цех байгуулжа, нютагаархинаа амтатай зүйлнүүдээр хангаха хүсэлтэй байнабди», - гээд фермер хэлэнэ.

Гартаа дүйтэй, миин һуужа байха сүлөөгүй Валерий Чебан тарилгын урда газараа бэлдэхэ культиватор зохёожо, ажалаа яһала хүнгэдхэнхэй. Энэниие нэгэ тээшэнь шэрээд ябахада, 12 метр үргэн газар үйлэдбэрилэгдэнэ.

 Наһанайнгаа нүхэртэй хамта бүхы ажалаа ябуулжа, саашадаа олон түсэбүүдтэй. 
Чебантанай ажахыда Буряад Уласай хүдөө ажахын болон эдеэ хоолой сайд Галсан Дареев ошожо, иимэ ажалша, бэрхэ зоной аргаар хүдөө нютаг улам хүгжэхэ гэжэ онсолоо.