Амтатайхан зөөлэн шэхэр Буряадта буйлуулагдана

Хүнэй бэедэ туһатай, оройдоошье саахар холигдоогүй аад, байгаалиһаа амтатайхан зөөлэн шэхэр буйлуулха гээшэ ехэл дэмбэрэлтэйшье, олзотойшье хэрэг. Улаан-Үдэдэ эршэмтэйгээр олзын хэрэг эрхилжэ байһан Лариса Кононова хүдөө гараха гэжэ шиидээд, Загарайн аймагай элдин һайхан Доодо Тайлса нютаг эльгэ зүрхыень татаа. Тиимэһээ энэл нютаг һунгажа, ажахыгаа эрхилхэ гэжэ шиидээ. Тиигээд лэ Буряадай Хүдөө ажахын яаманда хандажа, сэсэрлиг байгуулхаяа гүрэнэй туһаламжа - 1,5 сая түхэриг абажа, 3,5 гектар газарта 1370 алим, 1500 шасаргана болон 700 үхэр нюдэ һуулгаа.

Эхинһээнь урагшатайгаар

- Жэмэсэй шүүһэтэ зөөлэн шэхэртэ залууһаа дуратай һэм. Мүнөө болоходо, тэрэ амтатайхан зөөлэхэн шэхэр яагаад хэдэг юм гэжэ ехэтэ һонирхооб. Тиигээд тиимэшье орёо хүндэ ажал бэшэ юм байна - оролдохол хэрэгтэй, би өөрөө шадахаб гээд лэ, урагшаа шармайгааб. 2020 он дүүрэн өөрын онсо шэхэр хэхэ гэжэ оролдооб. Тииһээр ииһээр түрүүшын захилнуудые дүүргэжэ эхилээб, - гэжэ энеэбхилэн байжа Лариса урматайгаар хөөрэнэ. - Теэд хэжэ шадаха гээшэмнай тэрэ, харин тэрээнээ олондо дурадхажа наймаалха гээшэ баһал нэгэ ехэ арга юм гэжэ ойлгооб.

Эхилһэн хэрэгэйнгээ урагшалхада, Лариса Архиповна бүри үргэнөөр томохон дэлгүүрнүүдтэ болон эко-алаабхинуудта дурадхажа эхилээ. Тэрэнэй хэлэһээр, наймаалжа эхилхэһээ урид базаарта ямар сэнтэйб, ямар зүйлнүүдые дуратайгаар абанаб, хайшан гэжэ бүрилдүүлхэб, нюдэндэ дулааханаар харагдахаар яажа багсалхаб гэхэһээ эхилээд лэ, шанарыень, амтыень һайжаруулхаяа оролдоо.

Амтатай даа

Тиигээд лэ алим, үлир, үзэм, груша, үхэр нюдэнһөө гадна киви, банан, алим- корица, жэмэсэй микс холин эблэрүүлжэ, тон өөрын онсо зүйл үйлэдбэрилхэ гэжэ шиидээ.

Сүүдхэдэ 50-60 граммтай 12 пастила бэлдэнэ. Олон зоной абажа шадахаар Лариса Архиповна таарууханаар сэгнэнэ. Зүйлнүүдэйнгээ амтые үшөөл һайжаруулжа: «ЭКО ферма «АГАПЭ», Сделано с любовью» гэжэ шэнэ пастила мэнэ үйлэдбэрилжэ эхилхэ.

Буряадай Хүдөө ажахын яаманай мэргэжэлтэд хэлэхэдээ, байгаалиһаа сэбэр эдеэнэй зүйл үйлэдбэрилхэдөө, ганса республикаяа эдеэ хоолоор хангахаһаа гадна, хүршэ можо хизаарнуудташье, хари гүрэнүүдтэшье олзо оршотойгоор ябуулха аргатайбди гэжэ тэмдэглэнэ. Владимир Путинай хүдөө ажахын хүгжэлтэ тухай хэлэһээр, коронавирусай дэлгэрээд байхада, сэбэр эдеэ хоол үйлэдбэрилхэ тон шухала.