Амаралтань аятай байха гү?

Дулаан оронуудта амаралтаяа үнгэргэхэ һанаатайгаар путёвконуудые абаһан зондо мүнгыень бусааха гэһэн  зарлигта Ород Уласай премьер-министр Михаил Мишустин гараа табиба. Халдабарита үбшэнэй һүжэрһэнһөө боложо, манай нютагайхидай амарха эгээл дуратай Турци, Танзани гүрэнүүдтэ ошохо арга хизаарлагдаба ха юм. Энэ ушараар хэды олон хүн түсэблэһэн амаралтаяа дэмы һалгаба, урмаа хухарба гээшэб? 2020 оной мартын 31 болотор аяншалгын путёвко худалдажа абаһан зондо мүнгыень тэрэ зандань бусааха аргатай болоно.

Унтаха нойргүй болоод ябанабди. Аяншалагшадые ямар онгосодо һуулгажа эльгээхэб гэжэ унтаха сүлөөгүй ажаллажа байнабди. Турцида амарха байһан зондо Серби, Куба ошожо амархыень гү, али Ород Улас дотороо аяншалхыень дурадханабди, - гээд, аяншалга зохёодог эмхиин захиралай орлогшо Татьяна Немтаева дуулгана.

Гэхэтэй хамта Буряад Уласнай баһал аяншалагшадые угтахаяа хүлеэжэ байна. Ерэһэн зондо Байгал далай, нангин шүтөөнэй газарнуудые болон шэмээшэгүүдэй байра байдал харуулха. Эдэ бүхы газараар ябажа амархадаа, нэгэ хүн дунда зэргэ 40 мянган түхэриг гаргашалха болоно.