Арадай авто унаа

1970 оной апрелиин 19 - дэ ВАЗ 21 01 «Жигули» түхэлэй түрүүшын автомашина бүтээгдэжэ нара хараа бэлэй.
Арад зоной дунда «копейка» гээд алдаршаһан автомашина Италиин «ФИАТ - 124» гэһэн унааһаа буулгажа абтагдаһан. СССР гүрэндэ энээнһээ урид, мүн һүүлдэшье иимэ һайн шанартай авто унаа бүтээгдээгүй гээд мэргэжэлтэд мүнөө хэлсэдэг. Тэрэ үедөө ВАЗ 2101 «Жигули» эгээл һайн шанартай, хүн зоной һанаанда эгээл таару машина боложо үгөө. Һайнаар ашаглагдаһан тус автомашинын мотор 25-30 жэлэй туршада ямаршье заһабаригүй ябадаг байгаа. Энэ түхэлэй автомашина бүтээжэ гаргаһанай түлөө ВАЗ гэһэн завод, 1972 оной дүнгөөр уласхоорондын «Золотой Меркурий» гэһэн шагналда хүртэһэн юм. 1970 онһоо 1984 он болотор ВАЗ бүхыдөө 2,5 сая автомашина бүтээжэ гаргаһан түүхэтэй. 
СССР - эй үедэ мүнөөнэйхидэл адли дурлаһан автомашина худалдан абаха аргагүй байгаа гээд мэдэжэ байна ёһотойт. Тиихэдэ түмэр унаатай болохын түлөө хэдэн жэлэй туршада ээлжээндэ байха хэрэгтэй һэн. Тэрээнһээ гадуур олон жэлэй туршада һайнаар хүдэлһэн зон урмашуулагдадаг байгаа. Юрэдөө, иимэ автомашина абаха гээшэ олон зоной һанал бодол, зорилго байгаа бшуу. 
Мүнөөшье болотор хотын үйлсэдэ энэ түхэлэй автомашинанууд гүйлгэлдэжэ ябахыень хараха аргатайт. Энэ заводто бүтээгдэһэн эгээл һүүлшын авто хүлэг мүнөө 37 наһатай болонхой.