​​Байгалай эрьедэ тамирай танхим баригдана

Федеральна харгыһаа холо бэшэ, Максимиха һууринда, тамирай танхим баригдажа эхилээ. Эндэ бага-футбол, волейбол, баскетбол, теннис наадаха, тиихэдэ тамирай мүрысөөнүүдые үнгэргэхэ талмайнууд баригдаха.

Хоёр дабхартай байшанда бэеэ һорихо танхим, эдеэ хоол бариха газар, душевой, массаж хэхэ танхим, эмнэлгын таһаг, хубсаһаа һэлгэхэ газар болон бусад байха юм. Тамирай шэнэ объектдэ Максимиха һууринай айлшад болон ажаһуугшадта бэеэ һорихо арга олгогдохо.

Буряад Уласай Засагай газарай Түрүүлэгшын инфраструктура хүгжөөлгын талаар орлогшо албанай хэрэгээр Баргажанай аймагаар ябахадаа, барилгын ажал хараһан байна. Мүнөө котлован хэгдэжэ, фундамент бодхоохо талаар бэлэдхэлэй ажал ябуулагдана. «Дом 2000» гэһэн эмхи тамирай танхим барина.

Энэ барилга «Демография» гэһэн үндэһэн түсэлэй «Спорт-норма жизни» гэһэн федеральна түсэлэй хэмжээндэ ябуулагдана. Тэрэнэй барилгада 113 сая хэрэгтэй: федеральна бюджедһээ 111 сая түхэриг һомологдохо, 2 саяһаа дээшэ – уласай бюджедһээ. Байгша оной дүүрэтэр барилга дүүргэхээр түсэблэгдэнэ.