​Хизаарлалтын үедэ Буряад Уласай олзын хэрэг эрхилэгшэдтэ туһа хүргэгдэхэ

Буряадай Толгойлогшо Алексей Цыденов хизаарлалгын үедэ Засагай газар олзын хэрэг эрхилэгшэдтэ туһалхаар бэлэн гэжэ мэдүүлээ. Хизаарлалгын хэмжээнүүд уластамнай COVID-19 үбшэнэй дэлгэрһэн ушарһаа эмхидхэгдэнэ.

- Мүнөө үнгэрһэн жэлэй намарай дүнгүүдтэ дүтэлжэ байнабди. Шаналхаар лэ даа, энэ маниие баярлуулнагүй: бултадаа COVID-һаа эсээбди. Тиигэбэшье, юушье хэнгүй байха аргагүйбди, тиимэһээ һайшаалтай бэшэшье һаань, хизаарлаха шиидхэбэри абаха баатай болонобди. Юуншье болог, бүхы юумые хорихо гэһэн дурамнай хүрэнэ бэшэ, харин ондоо арга үгы. Тиимэһээ бүхы манай олзын хэрэг эрхилэгшэдые энээниие ойлгохыень уряалнаб. Эдэ аргагүйдэһэн хэмжээнүүд гэжэ ойлгогты, мүн хизаарлалганууд эгээл зөөлэнүүд ха юм, - гэжэ Буряадай Толгойлогшо мэдүүлээ.

Сүүдхэ соо үбдэгшэдэй тоо 70-аад хүрэтэр унабал, хизаарлалгые болюулжа болохо гэжэ Алексей Цыденов дуулгаа. Саг соонь олзын хэрэгэй ажалшадта салин хүлһэ түлэлгые дэмжэлгын асуудал Пионер Кино ООО «ЭрДжиБи-Синема» бүлгэмэй захиралай орлогшо Чимит Эрдынеев табиба:

- Бидэ коронавирустай тэмсэлые бүри мүһэн дэмжэнэбди, байдал хүндэ гэжэ ойлгонобди. Намда иимэ дурадхал байна: үйлэдбэриин хаагдашабал, хууляар ажалда абтаһан ажалшаднай хаагдаһан бүхы сагта туһаламжа абажа байхаар гү? Мүн баһа коммунальна түлбэринүүдые хүсэлдүүлхэ арга байха гү?

- Ажаһуугшадай болон олзын хэрэгэй харюусалгатайгаар энэ байдалда хандабалнь, «ковидна» үдэшэнүүд болон бэшэ найр наадануудай болоогүй һаа, июлиин 1 болотор һайн тээшэнь хубилгахабди гэжэ найданабди. Юунэйшье болоо һаань, хэндэ, юундэ, хэды туһаламжа хэрэгтэйб гэжэ мүнөө тоолохо хэрэгтэй. Хүнүүдэйнгээ тоогоор ажалайнгаа газар хүлһэлһэнөө, бэшэшье бүхыгөө тоолоод, мэдээсэлээ дары түргөөр Худалдаанай болон үйлэдбэриин яаманда оруулагты. Тэрээн дээрэ үндэһэлэн, ямар тэдхэмжэ үзүүлэгдэхэб гэжэ ойлгохобди, - гэжэ Буряадай Толгойлогшо харюусаа.

Олзын хэрэг эрхилэгшэд ажалайнгаа газарай хүлһэлэлгые, коммунальна түлбэринүүдые хүсэлдүүлхэ болон дэмжэлгын бэшэшье талаар асуудалнуудые зүблөөндэ табяа. Мүн баһа ажалай шэнэ гуримуудтай танилсаа.

Алексей Цыденов Засагай газарта болон яамануудта, олзын хэрэг эрхилэгшэдэй эрхэтэ түлөөлэгшэдэ эпидемиологическа байдалые уласта тогтонижоруулхын тула хүсэндөө ороһон шэнэ хизаарлалгануудай оршомдо олзын хэрэг эрхилэгшэдтэ ямар туһа үзүүлжэ шадахабта гэһэн арга боломжонуудаа дуулгахыень даабари үгөө һэн.

Сэнгэлгын түбүүдэй ажал 20 саг болотор хизаарлагдаа. Июлиин 1 болотор наймаанай түбүүд дотор хүдэлдэг фудкортнуудай ажал саг зуура тогтоогдобо. Тэдэ хүнүүдэй ерэлтэгүйгөөр хэрэглэһэн юумыень гаргажа үгэхэ болоно.

Энэл хугасаада наймаанай түбүүдэй дотор оршодог болон баһал амяараашье байрада оршодог үхибүүдэй зугаасалгын, наадалга - сэнгэлгын зононуудай болон түбүүдэй ажал болюулагдаа. Хизаарлалга паркнууд соохи аттракционуудташье хабаатай. Июлиин 1 болотор кинотеатрнуудай болон театрнуудай ажал тогтоогдоо. Буряадта масочна гурим сахилга шангадхагдаа. Хамгаалгын маскагүйгөөр олоной ябадаг газарнуудта хэниишье оруулхагүй. Эмхи зургаануудай, үйлэдбэри ажахынуудай хүтэлбэрилэгшэдтэ, аралжаа наймаа эрхилэгшэдтэ һэргылэмжын хэмжээнүүдые хангахые һануулаа.

Ерэхэ долоон хоногто Алексей Цыденов олзын хэрэг эрхилэгшэдтэй уулзахаар түсэблэнэ.