​«Жэлэй эрхим экспортёр» гэһэн нэрэ зэргэдэ Буряадай «Мэлэ» гэһэн хүдөө ажахы хүртэбэ

Захааминай аймагай «Мэлэ» гэһэн хүдөө ажахы уласай урилдаанда «Жэлэй эрхим экспортёр» гэһэн нэрэ зэргэдэ хүртэбэ.

- Мүнөөдэрэй байдалаар бидэ хальмаг үүлтэрэй һаамхай үнеэдые Казахстан гүрэн руу худалданабди. Жэлэй аяар 200 гаран толгой эбэртэ бодо мал тиишэнь эльгээнэбди. Хальмаг оронһоо һайн бухануудые асаржа, малайнгаа үүлтэр һайжаруулдаг гээшэбди. Манай ажахыда бүхыдөө 12 малшад ажалладаг юм. Тэдэмнай хара багаһаа хүдөө ажал мэдэхэ, һайн дүй дүршэлтэй малшад, - гэжэ хүдөө ажахын түрүүлэгшын орлогшо Зоригто Гомбоев дуулгана.

Буряад Уласай Хүдөө ажахын яамантай сугтаа һайн ажаллаһанай ашаар аха дүү монголнуудтаа бодо мал худалдахаар хэлсээ мэлынхид баталаа. «Мэлэ» СПК аяар 2004 онһоо эхилжэ, мал үсхэбэрилнэ, тэдэнэйнь тоо 700 гаран болонхой. Угсаата буряад арадайнгаа жэнхэни ажал эрхилжэ, амаа тоһодожо байһан Мэлэ нютагаархидай ажалынь бүри эршэтэйгээр хүгжэхэ бэзэ.