​Нютагай эдеэ - хямдаар

Буряадаймнай хүдөө ажахынууд өөһэдынгөө эдеэ хоол Улаан-Үдэдэ наймаалха тусхай шэнэ һууринуудтай болохонь. Энээн тухай даабари Буряад Уласай Толгойлогшо Алексей Цыденов һаяхана үгэбэ.

Һүүлэй үедэ гүрэн доторнай хүдөөгэй эдеэ хоолой сэн гансата дээшэлжэ эхилэнхэй. Бүхы ажаһуугшадые һанаа зобоомо энэ асуудал Ородой Юрэнхылэгшэ Владимир Путинай онсо хараа доро оронхой.

Хүдөөгэйхидэй өөрын экологическа сэбэр эдеэ хоол худалдаха газарнууд Улаан-Үдэдэ олошорхонь. Буряадай хүдөө ажахын болон эдеэ хоолой яаманайхид УлаанҮдэ хотын захиргаанай мэргэжэлтэдтэй хамта эгээл олоор хүнүүдэй ябадаг дэбисхэр дээрэ наймаанай шэнэ һууринуудые зохёохо юм. Бүхы дээрээ иимэ 50 гаран газарта “Буряадта бүтээгдээ” гэһэн эдеэ хоол наймаалагдажа эхилхэ.

Энэ аргаар эдеэ хоолой сэн доошолхо зэргэтэй. Мүн хүдөө ажахынхидай олзонь дээшэлхэ гээд һанагдана.