​Буряадай аяншалгын һалбаритай танилсуулха хэмжээ ябуулгада 100-һаа дээшэ инвесторнууд хабаадаа

Москва хотодо Байгалай можын инвестициин арга боломжотой танилсуулха талаар хэмжээ ябуулгада 100-һаа дээшэ олзын хэрэг эрхилэгшэд хабаадаа. Буряадай Толгойлогшо Алексей Цыденов уласай инвестиционно арга боломжонууд тухай элидхээ.

Промо-турай дүнгүүдээр Алексей Цыденов Буряад Уласта бэелүүлэгдэхэ инвестициин түсэлнүүдые Сбербанк дэмжэхээр бэлэн гэжэ хэлэбэ.

- Эрхүү можотой хамта Москвада үнгэргэһэн хэмжээ ябуулгада мүнгэ хүрэнгэ оруулха аргатай олон инвесторнууд байгаа. Шухалань гэхэдэ, Сбербанкын правлениин түрүүлэгшын нэгэдэхи орлогшо Александр Ведяхин Буряад Уласаар һонирхоһон инвесторые Сбер дэмжэжэ, бэелүүлэгдэхэ инвестициин түсэлнүүдтэ мүнгэ һомолхоор бэлэн гэжэ мэдүүлээ. Тиихэдэ Буряадай аяншалгын һалбари ашаг үрэтэй, арга боломжотой гэжэ Сбер этигэнэ. Сбербанкын бидэндэ этигэжэ байгаа хада инвесторнууд улас дотор орохол байха. Энэ хадаа аяншалга хүгжөөхэ һалбарида бидэнэй бизнес-бодолнуудые бэелүүлгэ урмашуулагдаха гэжэ этигэнэб, - гээд, Алексей Цыденов тэмдэглэбэ.

Хэмжээ ябуулгада Александр Ведяхин элидхэхэдээ, Буряад Улас болон Эрхүү можо олзын хэрэг эрхилхэ можо нютагууд болоно гэжэ тэмдэглээ. 

- Эдэ  можонуудай, хүтэлбэрилэгшэдэй оролдолго тэмдэглэхэ байнаб, юу хэжэ байһанаа тэдэнэр ойлгоно, мэдэнэ. Буряад Уласта, Эрхүү можодо бидэ инвесторнуудбди. Сберэй зүгһөө бэелүүлэгдэхэ түсэлнүүдые дэмжэхэбди гэжэ инвесторнүүдтэ хэлэхэ байнаб. Иимэ road show мэтын хэмжээ ябуулгануудай удаа баталагдаһан дурадхалнуудые онсо хиналта доро абадагбди. Би мүнгэн һангай олзын хэрэгэй түлөө харюусадаг нэгэдэхи орлогшо хадаа эндэ баталагдаһан хэлсээнүүдые даажа абажа, бэелүүлэгдэтэрнь ажаллахабди, - гэжэ Александр Ведяхин онсолбо.

Буряад Уласай болон Эрхүү можын дэбисхэртэ оршодог Байгал далайтай макроегионой аяншалгын арга боломжонуудтай танилсуулһан, мүнгэ хүрэнгэ оруулагшадта зорюулагдаһан road show «Байкал» промо-тур  сентябриин 28-да  Москвада үнгэрөө. Буряадай Толгойлогшо Алексей Цыденов болон Эрхүү можын амбан захирагша Игорь Кобзев можо нютагуудайнгаа инвестициин арга боломжонуудтай танилсуулаа. Хэмжээ ябуулгада аяншалгын талаар федеральна агентствын хүтэлбэрилэгшэ Зарина Догузова, «Туризм.РФ»  корпорациин юрэнхы захирал Сергей Суханов, олзын хэрэг эрхилэгшэ, инвестор Владислав Свиблов, «Космос ОГ» бүлгэмэй хүтэлбэрилэгшэ эмхиин юрэнхылэгшэ Александр Швейн, мэдээжэ композитор, «Фамилия» компанинуудай бүлэгэй хүтэлбэрилэгшэ Александр Шульгин гэгшэд хабаадаа.