​Улаан-Үдэһөө Омск хүрэтэр сэхэ рейс нээгдэбэ

Сентябриин 29-дэ "Red Wings" авиакомпани Омск - Улаан-Үдэ – Омск гэһэн шэглэлээр түрүүшын рейсдэ гараа. Сентябриин 15-һаа биледүүд худалдаанда гаража, Буряадай ажаһуугшад олоор һонирхоо.

Августын 31-дэ Ородой Транспортын яаман Засагай газарай тогтоолой хэмжээндэ тусхай тарифаар эрхэтэдые шэрэхээр бэлэн тухайнь авиакомпанинуудай мэдүүлгэнүүдые хараалһан байна. Суглаанай дүнгүүдээр байгша ондо Алас Дурнын тойрог дотор, тойрогһоо, тойрог хүрэтэр 25 шэглэл субсиди түлэгдэхэ бүридхэлдэ оруулагдаа. Энэ бүридхэлэй тоодо - Омск - Улаан-Үдэ – Омск гэһэн зам.

Буряад Уласай Засагай газарай Түрүүлэгшын орлогшо Евгений Луковниковай хэлэһээр, нэмэлтэ маршрудуудай ашаар, Буряад улас хүрэхэ талаар бэлэн болохо: «Апрель һарада Томск хототой сэхэ рейс нээгээбди, август соо – Владивосток хототой. Улаан-Үдэ-Омск-Улаан-Үдэ хадаа субсидиин түлэгдэхэ үшөө нэгэ шэглэл болоно. Алас Дурна зүгэй маршрудууд тухай хэлэхэ болоо һаа, зарим шэглэлэй сэн 40 мянган түхэриг хүрэнэ, субсидированна рейснүүдтэ биледүүдэй худалдагдажа эхилһээр нэгэ зүг руу 11 мянган түхэригһөө дээшэ болохогүй. Жэшээнь, Улаан-Үдэһөө Омск хүрэтэр 8500 түхэригөөр хүрэхөөр».

- Улаан-Үдэдэ энэ түүхэтэ хэрэг болоно. Энэ шэглэлээр һүүлшынхиеэ 30 жэлэй саана рейс ниидэһэн байна. Совет үедэ ажаһуугшад энэ шэглэлээр олоор ябадаг байгаа. Мүнөөшье энэ зам эрилтэтэй байха гэжэ һананаб. Среда, субботодо рейс ябуулагдаха, - гэжэ Буряад Уласай Транспорт, элшэ хүсэ болон харгын ажахы хүгжөөхэ талаар сайд Александр Гоге хэлэбэ.