​Байгша ондо Буряад Уласта арбан һургуули баригдажа эхилхэ

Концессионно хэлсээнэй хэмжээндэ һургуулинуудые бариха талаар үргэдхэгдэһэн зүблөөн Москва хотодо үнгэргэгдөө. Суглаанай хэмжээндэ Буряад Уласта 10 һургуули бариха талаар хэлсэгдээ. Барилгын түсэл 2021 ондо бэлдэгдэжэ, 2022 ондо һургуулинууд ашаглалгада тушаагдаха юм.

Буряад Уласай Засагай газарай Түрүүлэгшын орлогшо Евгений Луковниковой хүтэлбэри доро зүблөөн үнгэрөө. Тус хэмжээ ябуулгада «ПроШкола» компаниин, федеральна «РосКапСтрой» эмхиин, Буряад Уласай барилгын болон зөөриин болон газарай харилсаануудай талаар яаманай түлөөлэгшэд, барилгын эмхинүүд болон бусад хабаадаа.

Суглаанда барилгын хэгдэхэ газар элирүүлэгдэжэ, техникэ-эдэй засагай шухала тоонууд, хэды һууритай байшан баригдахаб гэжэ хэлсэгдээ. Тиигэжэ Улаан-Үдын 102-дохи микрорайоной һургуулиин һуури 400-һаа 450 болгогдоо.

Мүнөө ямар һууринуудта һургуули баригдахаб гэжэ эли болонхой: Забайкальский микрорайондо - 360 һууритай, 103-дахи квартал - 354 һууритай, 102-дохи квартал - 450 һууритай, Ивалгын аймагай Ивалга һууринда – 450 һууритай, Доодо Ивалга - 250 һууритай, Поселье – 250 һууритай, Сотниково - 250 һууритай, Сужа - 250 һууритай, Тарбагатайн аймагай Доодо Саяанта – 450 һууритай, Улаан-Үдын Жердевэй гудамжада - 250 һууритай.

- Мүнөө юридическэ асудалнууд хуу шахуу шиидхэгдээ. Даб дээрээ барилгын ябуулагдаха болзор, тоног хэрэгсэл асарха талаар асуудал тодорхойлогдоно. Октябриин 8 болотор концессионно хэлсээн баталагдажа, байгша ондо арбан объектнүүдэй түсэлэй болон бэлэдхэлэй ажал эхилхэ. Барилгын шэнэ хаһада болбосоролой эмхинүүд бодхоогдохо, - гэжэ Евгений Луковников хэлэбэ. 

Проектировани, барилга хэхэ болон технологическа тоног хэрэгсэлнүүдэй талаар техническэ даабаринууд баталагданхай.

- Эдэй засагай талаар ашаг үрэтэй гэжэ федеральна реестртэ оруулагдаһан түсэлнүүдээр һургуулинууд баригдаха. Жэлэй дүүрэтэр проектировани хэгдэхэ. Һаяын сагта барилга ябуулха газарнуудта бэлэдхэлэй ажал эхилхэ. Дулаасуулгын, зайн галай болон бусад һужаануудые холбохо талаар асуудалнууд эдэ эмхинүүдэй түлөөлэгшэдтэй хэлсэгдэнхэй, - гэжэ УКС-эй дарга Анатолий Урбанов хэлэбэ.

Байгша оной июнь һарада Буряад Уласай Толгойлогшо Алексей Цыденов Петербургын уласхоорондын эдэй засагай хуралдаанда ВЭБ.РФ гэһэн гүрэнэй корпорациин түрүүлэгшэ Игорь Шуваловтай суг ажал ябуулха тухай хэлсээ баталаа һэн. Тус хэлсээнэй ашаар, Ородой гүрэнэй программын хэмжээндэ «Болбосорол хүгжөөлгэ» гэһэн программын хэмжээндэ һургуули бариха талаар уласай түсэлнүүд бэелүүлэгдэжэ эхилээ. «ПроШкола» компани шэнэ һургуулинуудые барилгада хубиин капитал һонирхуулха талаар байгуулагдаа. «ПроШкола» компаниин капиталда «ВЭБ.РФ» гүрэнэй корпораци, ПАО «Сбербанк» болон «Просвещение» компанинуудай бүлэг ородог. Буряад Улас һургуули бариха талаар концессиин туршалгын хэлсээ баталһан гүрэнэй арбан можо нютагуудай тоодо ороо.