​Ростуризмын хүтэлбэрилэгшэ: «Аяншалгын һалбарида мүнгэ һомололго 10-дахин шахуу дээшэлээ»

Аяншалгын талаар федеральна агентство Байгал далайда аяншалгын һалбриин хүгжэлтэ дэмжэхэ. Энээн тухай Ростуризмын хүтэлбэрилэгшэ Дарина Зогузова Baikal Touristic Road Show гэһэн хэмжээ ябуулгада хэлээ.

 - Байгша ондо анха түрүүшынхиеэ аяншалгын һалбарида Үндэһэн түсэл гэһэн томо хэмжээнэй системнэ программа байгуулагдаа. Аяншалгын һалбарида мүнгэ һомололго 10-дахин шахуу дээшэлээ. Энэ программын ашаар, аяншалгын һалбарида байһан бүхы зорилгонууд шиидхэгдэнэ. Системнэ үндэһэтэй байхадаа, гүрэн доторой аяншалгын һалбариин инфраструктура хүгжөөхэ аргатайбди. Тэрэ тоодо, Байгал далай. Аргагүй һайхан байгаалитай, эндэ байгаалиин, хадаһаа һолжорхо туризм хүгжөөхөөр, томо, дунда хэмжээнэй зошод буудалнууд, кемпингүүд, глэмпингүүд, модульна зошод буудалнуудые барихаар. Суг ябуулха ажал ехэ, энэ хэрэг дэмжэхэбди, - гэжэ Зарина Догузова тэмдэглэбэ.

Шэнэ Үндэһэн түсэлэй хэмжээндэ гүрэнэй талаһаа урьһаламжын талаар процентнэ ставкада субсиди түлэгдэхэ. Байгша онһоо аяншалгын түсэлнүүдые бэелүүлжэ байһан туринвесторнуудта урьһаламжа үгтэхэ. Мүнгэ хүрэнгэ оруулагшадай мэдүүлгээр Ростуризм тэдхэмжэ үзүүлхэ.

- Байгша онһоо инвесторнууд үнэгүй, удаан болзорой 3% гү, али ехэдээл һаа 5%-тэй урьһаламжа номернуудай жасатай зошод буудалнуудай, олон үүргэтэй комплекснуудай барилга, һэльбэн шэнэдхэлгэдэ абаха аргатай. 100 саяһаа 70 миллиард хүрэтэр урьһаламжа абахаар. Һаяын гурбан жэлдэ 200 миллиард түхэригэй урьһаламжада субсиди түлэхөөр хараалнабди. Саашадаа түсэлнүүдэй ороходо, мүнгэ һомолжо, дэмжэжэ байхаар түсэбтэйбди. Аяншалгын һалбари, аяншалгын инфраструктура хүгжөөхэ талаар зохид оршон байгуулжа, инвесторнуудые һонирхуулхабди, - гэжэ Зарина Догузова хэлэбэ.

«Туризм.РФ» гэһэн генеральна корпорациин юрэнхы захирал Сергей Суханов Байгалай эрьедэ инфраструктура хүгжөөхэ болон номернүүдэй жаса олон болгохо талаар эдэбхи үүсхэл дэмжэбэ. Байгша ондо Сергей Суханов албанай хэрэгүүдээр Буряад Улас хоёр дахин ерэһэн байна. Тэрэнэй ерэһэн гол зорилгонуудай нэгэн хадаа улас доторой аяншалгын инфраструктура болоно.

- Байгал гээшэ үнэхөөрөө онсо шухаг дэбисхэр, тэрэ Ородой Холбоото Уласай танюуһата газар, дэлхэйн аяншалгын һалбариин анхарал татаһан түб болоно. Тиимэһээ энэ түбтэ хүнүүдэй һаадгүй хүрэхөөр болгохо гээшэ бидэнэй гол зорилго. Энэ ехэ харюусалгатай, хүшэр ажал. Мүнөө Буряад Улас Эрхүү можо хоёр Байгалай дэбисхэрэй байгаалида хохидол үзүүлэнгүй, хүгжөөхэ гэһэн харюусалга даанхай. Аяншлагын инфраструктура хүгжөөхэ талаар ехэ зорилгодо хабаатай байха гээшэ бидэндэ ехэ хүндэтэй, бидэ мастер-түсэбүүдээ бэлдэжэ, Байгалай можонуудта хүсөө нэгэдүүлхэбди, - гэжэ Сергей Суханов тэмдэглэбэ.

Baikal Touristic Road Show гэһэн хэмжээ ябуулга Москва хотодо Сбербанкын талмайда сентябрииин 28-да үнгэрөө. Аяншалгын һалбарида мүнгэ хүрэнгэ оруулдаг 100-һаа дээшэ олзын хэрэг эрхилэгшэд хэмжээ ябуулгада хабаадаа. Хэмжээ ябуулгын айлшадта Буряадай соёлтой танилсаха арга ганса уласай инвестициин талаар танилсуулгын үедэ олгогдоо бэшэ, харин тиихэдэ «Ханхалаев» гэһэн галерейдэ Baikal Touristic Road Show гэһэн промо-турай хэмжээндэ хэлсээнүүдые баталха тусхай талмай бэлдэгдээ.