​Буряад Уласай Арадай Хуралда гараха жэлэй бюджедэй талаар хэлсэбэ

Жэлэй эсэстэ гансата дүн согсологдохо бэшэ, харин шэнэ түсэбүүд табигдадаг. Арадай Хуралай мүнгэнэй хорооной дэргэдэ ерэхэ жэлэй бюджет тухай зүбшэн хэлсэгдээ.

Ерэхэ жэлэй мүнгэнэй hан 84 шахуу миллиард түхэриг бүридүүлхэ, гаргашань 5 миллиард түхэригээр ехээр хараалагдана. Бюджедэй ехэнхи 70 хубинь ниигэмэй талаар хэмжээ ябуулгануудта тараагдаха. Өөрын олзо орошо 33 миллиард түхэриг хүрэтэр түсэблэгдэнэ. Ехэнхи мүнгэн гүрэн түрын hанhаа түлөөhэгүйгөөр буудаг ха юм, 2022 ондо 50 миллиард түхэриг ерэхэ гэжэ мүнгэн һангай сайдай орлогшо Ольга Хайдурова тэмдэглээ.

Жэлэй туршада бюджет гээшэ ходо hэлгэгдэдэг, тиин байд гээд лэ hунгамалнууд нэмэлтэнүүдые оруулжа байдаг. Тиигэбэшье хуулиин проектые абаха хэрэгтэй, нэн түрүүн һунгамалнууд ажалай бүлэгүүд соо харадаг, hүүлээрнь олониитын уншалгануудта дутуу дундануудынь элирүүлэгдэдэг. Ниитын шагналгануудта ямаршье хүн ерэжэ, бюджет соо ямар нэгэ hэлгэлтэ оруулагты, жэшээнь, нютагтамнай соелой байшан, hургуули, сэсэрлиг баригты гэжэ нэхэхэ аргатай.

Хуулиин 2-дохи уншалга болотор хэды мүнгэн ерэхэб гэжэ хүсэд элирхэ гэжэ бюджедэй хорооной түрүүлэгшэ Александр Бардунаев хэлэбэ. Зүбшөөгдэhэн нүгөө асуудал гэхэдэ, эмэй сан, гуталай наймаануудай оруулдаг татабариин хэмжээе hөөргэнь бодхоохо тухай байба. Һунгамалнууд тус асуудалые зүбшөөбэгүй. Бусад хүнгэлэлтэнүүдээр hунгамалнууд мүн лэ асуудалнуудые табина. Тиигэжэ шэнээр уулзажа, татабари суглуулагшадтай дахяад зүбшэлсэхэ гэжэ хэлсэбэд.