Алас Дурнаар аяншалга

«Алас Дурна аргагүй гоё газар, манай ехэ ороной 40 хубииень эзэлдэг. Тэрэнэй дэбисхэр дээ­рэ бүхы юумэ харахат, олон янзын арьяата- наар, ургамалаар баян газар ха юм. Сүлөө сагтаа Алас Дурнаар аяншалхаһаа гоё юумэ би мэдэнэгүйб. 10 гаран жэлэй тур­шада амаралтынгаа бүхы үдэрнүүдые Алас Дурнада үнгэргэдэгби. Минии голхорол­до, олон зон манай нютаг ерэжэ үзөөгүй. Тиимэһээ Алас Дурнын дабтагдашагүй га­зарнуудые Россиин бүхы ажаһуугшадта харуулха хүсэл конкурсын гол зорилго бо­лоно. Аяншалжа ябаһан хүн сэдьхэлэйнгээ оёорһоо буулгабари хэнэ, тиимэһээ ямар­шье ондоо фильм тэрэниие хүсэхэгүй», - гэжэ Россиин Засагай газарай Түрүүлэгшын орлогшо – Оросой Холбоото Уласай Юрэн­хылэгшын Алас Дурнын тойрогоор бүрин эрхэтэ түлөөлэгшэ Юрий Трутнев хэлэбэ.

Буряад ороной ажаһуугша Никита Суха­нов «Алас Дурна - уршагта ябадалнуудай газар» гэжэ 1-дэхи конкурсын «Уһан дээгүүр аяншалга» янзада 2-дохи һуури эзэлээ һэн. Тэрэ нэгэ үдэрэй туршада Саяан хада ба Ха­мар-Дабаан зубшажа, хадын Иркут голоор уруудан аяншалһан байна.

– Хадын голоор аяншалгын үедэ Түнхэнэй хүнды, Саяан уула бидэниие той­рон байгаа. Хэдыдэшье, ямаршье сагта эрье дээрэ гаража, һархяаг гү, али алирһа түүхээр. Манай Буряад орон дабтагдашагүй гоё, һайхан байгаалитай, тиимэһээ фильм харагшад манай газар дэбисхэртэ дурла­хыень ехээр хүсэһэн байнабди, - гэжэ Ни­кита хэлэбэ.

Конкурсдо хабаадахын тула Алас Дур- наар аяншалһан тухай богонихон фильм буулгажа, https://путешественникдв.рф сай- таар шүүгшэдэй үзэмжэдэ эльгээхэ хэрэгтэй. Конкурс хэдэн янзануудаар үнгэргэгдэхэ. Наһаа хүсэһэн зонһоо гадна ехэшүүлэй уда­ридалга доро 10-һаа дээшэ наһатай үхибүүд тус хэмжээ ябуулгада хабаадаха аргатай. «Непутевые заметки» дамжуулгын автор ба хүтэлэгшэ Дмитрий Крылов, Арктикаар аяншалагша, видеоблогер Богдан Булычев, телевидениин дамжуулгануудые хүтэлэгшэ Валдис Пельш, «Больше, чем путешествие» түсэлэй хүтэлбэрилэгшэ Олеся Тетерина, Оросой Холбоото Уласай Гүрэнэй Дүүмын һунгамал, «Как устроен мир» теле-дамжуул­гын автор ба хүтэлэгшэ Тимофей Баженов, VK Места түсэлэй продюсер Никита Афино­генов гэгшэд шүүгшэдэй бүридэлдэ оробо.

Эрхим хүдэлмэринүүд можо хиза­арнуудай теле-субагуудаар дамжуулаг­даха, Алас Дурнаар аяншалгын замуу­дай интерактивна картада оруулагдаха. Конкурс Юрий Трутневай үүсхэлээр, Россиин Зүүн зүгые хүгжөөлгын яаманай, «Алас Дурные ба Арктикые хүгжөөлгын кор­пораци» гэһэн акционернэ бүлгэмэй, «Нии­гэмэй үүсхэлнүүдые хүгжөөлгын жаса» гэжэ аралжаанай бэшэ нэгэдэлэй дэмжэлгээр үнгэргэгдэнэ. Конкурсын түрүүшын хаһада Алас Дурнаар аяншалга тухай 200 гаран фильм шүүгшэдэй үзэмжэдэ табигдаһан байна, тэрэ тоодо Буряад оронһоо - 12. Дүнгүүдынь 2023 оной ноябрь һарада «Рос­сия» гэжэ уласхоорондын үзэсхэлэн - хурал­даанай үедэ согсологдоо һэн.