«Манай Буряад орон» гэһэн суглаанда Буряадай Толгойлогшо элидхэл хээ

Буряад Уласай Толгойлогшо Алексей Цыденов үнгэрһэн долоон хоногто эмхидхэгдэһэн «Манай Буряад орон» гэжэ хоёрдохи суглаа нээхэдээ, уласай зорилгонуудые тодорхойлбо. Арад зоноо гамнаха, арад зоноо олон болгохо гээшэ гол зорилго гэжэ Алексей Цыденов онсолоо.

Буряад Уласай Толгойлогшын тэмдэглэһээр, нээмэл нэгэдэхи суглаанда 1000 гаран үүсхэл дурадхагдаһан байна, табан жэлэй туршада тэдэнэй 70 хубинь бэелүүлэгдээ.

 «Мүнөө бидэ дүнгүүдые согсолхобди, ерээдүйнгөө түсэб табихабди. Саашаа юу хэхэеэ бидэ зүбшэн хэлсээ һэмди. 5 жэлэй саана стратегическэ сессинүүд ба дүхэриг шэрээнүүдтэ 1000 гаран дурадхал ороо һэн. Тэдэнэй ехэнхинь бэелүүлэгдээ. Бүхы манай хөөрэлдөөн саарһан дээрэ үлэхэгүй, ажалдамнай хэрэгтэй болохо. Тиимэһээ мүнөөдэр ехэ удха шанартай хэмжээ ябуулга боложо байна.

Мүнөө юун бидэндэ эгээ шухала болоод байнаб? Илалта! Сэрэгэй тусхай операцида илалта! Бидэ булта, Россиин ямаршье буланда ажаһуугшад, хүн бүхэн, мүнөөдэр иимэ хүсэлтэй. Илалтын түлөө бүхы юумэ хэнэбди. Манай хүбүүд Эхэ ороноо баатарлигаар хамгаална, манай мүнөөдэрые ба ерээдүйе аршална. Мүнөө эндэ сэрэгэй тусхай үйлэ хэрэгүүдтэ хабаадагшад, тэдэнэй түрэлхид байна. Би тэдээндэ талархалаа мэдүүлнэб. Сэрэгэй тусхай операциин эхилһэнһээ хойшо 5,5 миллиард түхэриг фронтын урда талада дайлалдажа байһан сэрэгшэдые дэмжэлгэдэ  шэглүүлэгдээ. Зарим хэрэгүүдтэ мүнгэн хүрэнэгүй, мэдэнэб, бидэ мүнгэн зөөрёор хангалга хаһанабди, юун эгээл шухала болоод байнаб гэжэ ойлгонобди. Арад зон өөһэдөө туһа хүргэнэ, бүхы улас илалтын түлөө нэгэдээ. Бүхы юумэн илалтын түлөө хэгдэнэ. Харин бидэ хүгжэлтын түлөө ажалаа ябуулһаарбди. Манай хүбүүд гэртээ бусахадаа, ажабайдал үргэлжэлнэ, бүхы юумэн эмхи журамтай гэжэ хараха. Эдэ бүгэдэ юунэй түлөөб? Юун бидэндэ эгээл шухалаб? Юундэ бидэндэ һайн харгы хэрэгтэйб? Юундэ бидэндэ һайн ажал хэрэгтэйб? Юундэ бидэндэ һайн эмнэлгын газар, һайн һургуули, һайн хүүгэдэй сэсэрлиг хэрэгтэйб? Бүхы юумэн арад зоноо гамналгада, арад зоноо олон болгохо хэрэгтэ зорюулагдана. Бидэ мүнөөдэр байха ёһотойбди! Энэ мүнөөдэрэй дэлхэйн дуудалга, 10 жэлээр, 20 жэлээр, 100 жэлээр. Энэ дуудалга аралдай урда, үндэһэтэнэй урда. Бидэнэй хэжэ байһан юумэн - манай ерээдүйн түлөө. Хэдэн жэлэй саана эхэнэр бүхэн 2-һоо дээшэ хүүгэдые түрэжэ байгаа. Мүнөө жэл ерэхэ бүри бидэ үсөөн боложол байнабди. Бидэ олон боложо байха ёһотойбди. Бидэ юунэй түлөө хүгжэнэбибди? Хэндэ барилга хэнэбибди? Юунэй түлөө манай хүбүүд ами наһаяа үгэнэб?  Манай арад, манай үхибүүд, манай аша гушанарай түрэһэн газар дээрээ амгалан тэнюун ажаһуухын түлөө. Хүн бүхэн бата бэхи бүлэтэй, олон хүүгэдтэй байха ёһотой.

Би мүнөө нэн түрүүн залуушуулда ханданаб. Үхибүүн бүхэн ахатай, нүхэртэй, хүршэтэй байхадаа ехэ һайн гэжэ тоолоноб.  Залуушуул беэдээ найдажа, угаа үргэлжэлүүлхэ ёһотой. Тэдхэмжын мүнгэнэй ехэ болоходо, үгы гэбэл, нэгэ хэрэг бүтээгээд, һүүлдэ үхибүү түрэхэбди гэжэ бү түсэблэгты. Тэдхэмжын мүнгэнэй түлөө үхибүү түрэһэн зон гараа үргэгты. Хэншье үргэнэгүй, иимэ залуушуул үгы. Бурхан үхибүү үгэхэдөө, хүсэ шадал үгэхэ. Саашаа бидэ, манай хүүгэд, аша зээнэр ямараар ажаһуухаб, энэ бидэнһээ дулдыдаха.

Хүгшэн аба эжынэр бэеэ абангүй, залуушуулдаа туһалха ёһотой.

Мүнөөдэр минии суг ажалтан Буряад Уласта юун баригдааб, үшөө ямар барилганууд болохоб, ямар хубилалтанууд хүлеэгдэнэб гэжэ хөөрэхэ. Манай Юрэнхылэгшэ бидэниие дэмжэнэ. Ерэхэ зургаан жэлдэ үндэһэтэнэй түсэлнүүдтэ бүри ехэ мүнгэн һомологдохо. Үнгэрһэн зургаан жэлэй туршада 109 миллиард үндэһэтэнэй түсэлнүүдые бэелүүлгэдэ шэглүүлэгдээ. Мүнөө сэрэгэй тусхай үйлэ хэрэгүүд боложо байна, тиигэбэшье 150 млрд 6 жэлэй туршада һомологдохо. Энэ мүнгэн зөөри ганса үндэһэтэнэй түсэлнүүдые бэелүүлгэдэ үгтэнэ. Тэрэнэй хажуугаар олон ондоо программанууд бии.

Бидэ манай хото үшөө гоё болгохобди. Россиин Юрэнхылэгшын баталһан мастер-түсэбөөр Буряад ороноо һайжаруулхабди. Юрэнхылэгшэ манай улас ерэжэ, зургаан жэлэй мастер-түсэб баталаа. Бидэ харгы дээгүүр гарадаг хүүргэнүүдые баринабди, автобус трамвайн тоо ехэ болгообди. Хуушарһан гэр байрын орондо шэнэ гэрнүүдые баринабди. Үндэһэтэнэй музейн, «Байгал» театрай байшангууд бодхоогдоно, оюутадта дэлхэйн хэмжээнэй кампус баригдана.

Хүндэтэ нютагаархид! Мүнөөдэр, үглөөдэр бидэ хүсэ шадалтай, жаргалтай боложо, манай ерээдүй һаруул байха болтогой! Энэ манай гол зорилго», - гэжэ Алексей Цыденов хэлэбэ.

Һануулхада, «Манай Буряад орон» гэжэ уласай Засагай газарай 1-дэхи суглаан 2020 оной февралиин 8-да үнгэргэгдэһэн байна. Нээмэл суглаанда 2000 гаран зон хабаадаа, 12 шэглэлээр 1084 дурадхал ороо һэн. Тэдэнэй 624-ниинь бэелүүлэгдээ, 179 үүсхэл бэелүүлэгдэжэ байна. 2025 оной хэмжээ ябуулга уласай ажаһуугшадтай харилсаа үргэдхэхэ зорилготой.