Буряад Уласай Толгойлогшо албанай хэрэгээр – Монголой ниислэлдэ

Мартын 19-дэ Буряад Уласай Толгойлогшо Алексей Цыденов Улаан-Баатарай хүтэлбэрилэгшэ Хишгээ Нямбаатарай урилгаар Монголой ниислэл руу албанай хэрэгээр гараа. Мүнөөдэр Алексей Цыденов Монголой Гүрэнэй Агууехэ Хуралай түрүүүлэгшын орлогшо Бухчулуун Пурэвдоржтой, Улаан-Баатар хотын хүтэлбэрилэгшэтэй, Монгол гүрэндэ Оросой Холбоото Уласай элшэн сайд Алексей Евсиковтэй уулзаха.

- Улаан-Баатар хото Монгол гүрэнэй ниислэл байхаһаа гадна хүгжэлтын түб болоно. Манай хамтын ажал холын хараа бодолнуудтай.  Монголтой бидэ саг үргэлжэ элдэб һалбаринуудта аша үрэтэйгөөр харилсанабди. Экономикын талаар наймаанай хэмжээн, хоёр талын хүрэнгэжүүлгэ дээшэлһээр.  Ниигэмэй һалбарида хэлсээтэйгээр ажалаа мүн ябуулнабди. Бидэ Монголой оюутадые ород хэлэндэ һурганабди, тэрэнэй удаа тэдэ нютагтаа багшын ажал эрхилнэ. Монголой оюутадые Улаан-Үдын түбтэ баригдажа байһан шэнэ кампуста һургахаар хараалагдана. Энэ түсэл бэелүүлгын асуудал тухай суг ажалтанаараа зүбшэн хэлсэхэбди. Уулзалганууд хамтын ажаябуулга бүри бэхижүүлхэ, этигэнэб, - гэжэ Алексей Цыденов тэмдэглээ.

Энээнһээ урид Алексей Цыденов Монголой Үндэһэтэнэй теле-субагта (MNB) интервью үгөө, Монголой дэбисхэр дээрэ 2023 оной декабрь һараһаа ажалаа ябуулжа байһан монгол-орос AIST-Global теле-субаг хүрөө. Уулзалгын үедэ Россиин ба Монголой олондо мэдээсэл тараадаг хэрэгсэлнүүдэй хүтэлбэрилэгшэнэрые, сэдхүүлшэлые «Халхын Голдо илалта туйлаһаар 85 жэлэй ойдо» медаляар шагнаа. Шанда хүртэгшэд түүхын дурасхаал хадагалха, манай арадуудай хани барисаа бэхижүүлхэ хэрэгтэ хубитаяа оруулһан байха юм.

2025 ондо Агууехэ Эсэгын дайнда илалта туйлаһаар 80 жэл тэмдэглэгдэхэ. Энэ ой манай гүрэнүүдые нэгэдүүлнэ. Илалтын 80 жэлэй ойтой дашарамдуулан, мартын 20-до Улаан-Баатарай Зайсан-Толгой хадада оршодог совет сэрэгшэдэй хүшөөдэ баглаа сэсэгүүдые табиха.