352
Россиин Засагай газарай бүлгэм Улаан-Үдэ хотын сэбэрлэлгын түхеэрэлгэнүүдые һэльбэн шэнэлхэ түрүүшын ээлжээнэй хэмжээ ябуулгануудта туһа хүргэхэ үүргэтэй ерээ. Бүлгэмэй бүридэлдэ Барилгын ба Байгаалиин нөөсэнүүдэй яамануудай түлөөлэгшэд ороо. Россиин Засагай газарай түрүүлэгшын орлогшо Дмитрий Патрушев Буряадай Толгойлогшо Алексей Цыденовэй хандалгаар тус бүлгэм бүридхөө. Мартын 22-то ажалай бүлгэм объектдэ ерэжэ, Байгал далай хамгаалха талаар Россиин Юрэнхылэгшын даабари түргэн бэелүүлхэ хамтын шиидхэбринүүд тухай хөөрэлдэбэ.
– Барилгын яаман һэльбэн шэнэлэлгын хүдэлмэринүүдые дүүргэжэ байһан эмхиин ажал шангадхаха шиидхэбэри абаа. Түсэб дүүргэгдэхэ. Россиин Засагай газар «Инцидент» гэжэ тусхай талмай байгуулаа. Эндэ долоон хоногой нэгэ удаа сэбэрлэлгын түхеэрэлгэнүүдэй барилгын ябаса харагдадаг. Захил хэһэн нютаг можын хэмжээ ябуулганууд һайнаар, түсэбэй ёһоор эмхидхэгдэнэ, - гэжэ Россиин Засагай газарай Түрүүлэгшын орлогшо Дмитрий Патрушевай секретариадай хүтэлбэрилэгшын орлогшо Джамбулат Хатуов тэмдэглэбэ.
Алексей Цыденов ганса Буряад Уласай, Эрхүү можын, Үбэр Байгалай хизаарай бэшэ, харин федеральна засагай газарай урда табигдаһан зорилгонуудаар шиидхэбэри абахаяа ерэһэн Россиин Засагай газарай түлөөлэгшэдтэ баяр хүргэбэ. Россиин Барилгын ба гэр байрын ажахын яаман Улаан-Үдэ хотын баруун эрьеын сэбэрлэлгын түхеэрэлгэнүүдые һэльбэн шэнэлэлгэдэ эдэбхитэйгээр туһаллна.
– Мүнөөдэрэй байдалаар түһөө түсэб зохёогшод нютаг можын уларилай онсолигуудые хараалан шиидхэбэринүүдые абахын тула түсэл тодорхойлогдоо. Объект дээрэ хэгдэжэ байһан ажалай дүнгүүд, түсэлэй талаар шиидхэбэринүүд, уһа сэбэрлэлгын тусхай түхеэрэлгэнүүдээр хангалгын асуудал долоон хоногой нэгэ удаа нютаг можотой эмхидхэгдэһэн суглаан дээрэ харагдадаг, - гэжэ Россиин Барилгын ба гэр байрын ажахын сайдай орлогшо Алексей Ересько мэдээсэбэ.
Буряад Уласай Толгойлогшо Алексей Цыденов Россиин Засагай газарай бүлгэмэй ажал үндэрөөр сэгнэбэ.
– Ямар шиидхэбэринүүд саашадаа абтахаб гэжэ мүнөө хаража байнабди. Россиин Байгаали хамгаалгын яаманай хэмжээндэ жэлэй туршада түсэл бэелүүлгэдэ хэрэгтэй болохо мүнгэн зөөриин талаар сэгнэлтэ хэгдэжэ байна. Эндэ түсэл бэелүүлгын, Роскапстрой, Росстройконтроль эмхинүүд хүдэлнэ. Ажалай, мүнгөөр хангалгын, энэ жэлдэ объектын түрүүшын шата дүүргэхэ талаар журам бэлдэгдэжэ байна. Россиин Юрэнхылэгшын ба Засагай газарай даабари дүүргэхын тула арга хэмжээнүүд абтаха, - гэжэ Алексей Цыденов онсолбо.
Сэбэрлэлгын түхеэрэлгэнүүдэй барилгын ябасатай танилсаһанай удаа Буряад Уласай Толгойлогшо Алексей Цыденовэй, Россиин Засагай газарай Түрүүлэгшын орлогшо Дмитрий Патрушевай секретариадай хүтэлбэрилэгшын орлогшо Джамбулат Хатуовай ударидалга доро суглаан үнгэргэгдэбэ. Холбоото уласай түсэл бэелүүлхын тула подрядна эмхиин ажал шангадхаха, барилга түргэдхэхэ хэрэгтэй гэжэ тэмдэглэгдээ. Тэрээнһээ гадуур гүрэнэй экспертизэ заабол гараха хэрэгтэй, тэрэ тоодо биологическа. Тиихэдэ бүтээгдэһэн конструкцинүүдые «Строительство» гэһэн Россиин Барилгын яаманай институдта шэнжэлхэ шиидхэбэри абтаа.
Һануулхада, Улаан-Үдын сэбэрлэлгын бодхолгонуудые һэльбэн шэнэлхэ түсэл холбоото уласай «Байгал далай хамгаалга» түсэлдэ оруулагдаһан юм.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
