Владимир Путин Буряадай Толгойлогшотой уулзаба

Апрелиин 2-то Москвада Буряадай Толгойлогшо Алексей Цыденов Россиин Юрэнхылэгшэтэй уулзаба. Уласай Толгойлогшо нютаг можын хүгжэлтэ, һаяын сагта бэелүүлэгдэхэ бодолгонууд ба түсэбүүд тухай хөөрэбэ, үндэһэтэнэй ба хүрэнгэжүүлгын түсэлнүүдэй дүнгүүдтэй танилсуулба.

Алексей Цыденов элидхэлэйнгээ эхиндэ сэрэгэй тусхай үйлэ хэрэгүүдтэ хабаадагшадые, ветерануудые дэмжэлгэ тухай хөөрөө.

Түрүүлэн бэелүүлхэ зорилго

Түрүүлэн бэелүүлхэ зорилго хадаа түргэн илалта туйлажа, гэртээ бусахын түлөө манай хүбүүдтэ бүхы шадалаараа туһалха гээшэ болоно. Буряад Уласта сэрэгшэдые дэмжэлгын 48 арга бэелүүлэгдэнэ. Гэр бүлэдэмнай бүхы юумэн һайн, хүүгэдтээ, аба эжынэртээ һанаагаа зобохо хэрэггүй гэжэ хүбүүднэй нэн түрүүн ойлгохо ёһотой. Сэрэгшэдэй үхибүүд һургуулидаа түлбэригүйгөөр эдеэлнэ, үндэр наһатай болоһон гэртэхиниинь харууһан доро байна. Тиихэдэ һураггүйгөөр үгы болоһон хүбүүдэй гэр бүлэнүүдтэ үнгэрэгшэ жэлһээ эхилжэ, ЖКХ-гай түлбэри хүсэлдүүлнэбди. Оршон байдалда дадалгын тамир хүгжөөнэбди. Сэрэгэй тусхай үйлэ хэрэгүүдтэ хабаадаад ерэһэн хүбүүд бэеэ һорино, бүхэроссиин мүрысөөнүүдтэ шалгарһан, илагшадай тоодо ороһон тамиршад бии, - гэжэ Алексей Цыденов мэдээсэбэ.

Буряад Уласта байлдаанда хэрэгтэй түхеэрэлгэнүүдээр сэрэгшэдые хангаха талаар хэмжээ ябуулганууд үнгэргэгдэнэ. Тэрээнһээ гадуур фронт дэмжэхэ шэнэ үйлэдбэринүүд байгуулагдаа.

-  «Патриотическая» гэжэ уридшалан хүгжөөлгын дэбисхэр улас дотор бии. Алас Дурна тэдхэхэ Юрэнхылэгшын мүнгэн зөөрёор Юрий Петрович Трутнев шэнэ үйлэдбэри нээхэ үүсхэл гаргаа һэн. Робототехническэ комплекснүүдые, FPV, хүтэлэгшэгүйгөөр ниидэдэг аппарадуудые тэндэ бүтээнэбди», - гэжэ Алексей Цыденов тэмдэглээ.

«Талаан бэлигтэй хүнүүд олон, тэдэндэ ажаллаха арга олгохо хэрэгтэй», - гэжэ Юрэнхылэгшэ хэлэбэ.

Үндэһэтэнэй түсэлнүүд: дүнгүүд ба хараа бодолнууд

Алексей Цыденов нютаг можын ниигэмэй ба экономикын хүгжэлтэ тухай хөөрэбэ. Уласай Толгойлогшын тэмдэглэһээр,  2019 онһоо үйлэдбэри 32 хубяар ургаһан байна, 2024 ондо - 5 хубяар. 

 «2019 онһоо хойшо Буряад ороной үйлэдбэри хүгжэһөөр. Салинай талаар муу бэшэ эрхэ байдал үзэгдэнэ. Мүнөөдэр дунда зэргын салин 69 000 түхэриг болоно. Оросой Холбоото Улас дотор 32-дохи һуури эзэлнэбди.

Хүрэнгэжүүлгээр бидэ 15-дахи бүлгэмдэ оронобди, Стратегическэ үүсхэлнүүдэй Агентство бидэниие сэгнэжэ, эгээ түргэн ургалта харуулһанай түлөө шагнал барюулаа», - гэжэ Алексей Цыденов хөөрэбэ.

«Хүрэнгэжүүлгээр һайн дүнгүүдые харуулнат. Ямар юумэнһээ энэ дулдыданаб?», - гэжэ Юрэнхылэгшэ һураа.

 «Ехэнхинь танай түсэлнүүдһээ. Зүүн зүгэй полигон, ЛЭП-500 һэльбэн шэнэлэгдээ, томо түсэлнүүд  бэелүүлэгдээ. Мүнөө жэлдэ хүрэнгэжүүлгын талаар нэгэ бага доошоо орообди, томо түсэлнүүдэй бэелүүлгэ дүүрэбэ», -  гэжэ Буряад Уласай Толгойлогшо тэмдэглээ.

Юрэнхылэгшын даабаряар бэелүүлэгдэһэн үндэһэтэнэй түсэлнүүдэй дүнгүүдтэй Алексей Цыденов танилсуулаа.

 «Владимир Владимирович, танай даабаряар бэелүүлэгдэһэн үндэһэтэнэй түсэлнүүдтэ анхаралаа хандуулха һанаатайб. 46 хүүгэдэй сэсэрлиг, 41 һургуули шэнээр баригдаа, 91 һургуули заһабарилагдаа. Хүүгэдэй сэсэрлигүүдтэ ээлжээн үгы, һургуулинуудта 3-дахи халаан усадхаабди», - гэжэ Алексей Цыденов хэлэбэ.

Буряадай Толгойлогшо үндэр наһатай зоной байдаг «Нарата» гэжэ пансионадай ажал хэрэгүүдтэй мүн танилсуулаа. Үндэһэтэнэй түсэлнүүд нютаг можын хүгжэлтын ба һэльбэн шэнэлэлгын үндэһэ һуури болоо гэжэ Толгойлогшо тэмдэглээ.

 «Соёлой 96 объект, тамирай 62 объект, тэрэ тоодо лукодром, нэгэ нэгээрээ тулалдаанай түб, элүүрые хамгаалгын 106 объект байгуулагдаа, мүн заһабарилагдаа. Владимир Владимирович, харгы тухай хэлэбэл, 1830 километр харгы үндэһэтэнэй түсэлэй хэмжээндэ хээбди. 98 хүүргэ заһабарилагдаа. Ажал эдэбхитэйгээр ябуулагдана», - гэжэ Алексей Цыденов хөөрэбэ.

Россиин Юрэнхылэгшын хабаадалгатайгаар Буряад Уласта цинкын хадын ба шанаржуулгын комбинат нээгдээ, бериллэй түрэһэн газар элдүүрилэгдэнэ. Эдэ үйлэдбэринүүд Росси дотор эгээ томо үйлэдбэринүүдэй тоодо ороно.