220
Апрелиин 2-то Буряад Уласай Толгойлогшо Алексей Цыденов Оросой Холбоото Уласай Юрэнхылэгшэ Владимир Путинтай албанай хэрэгээр уулзаба. Уулзалгын үедэ Буряадай Толгойлогшо үндэһэтэнэй түсэлнүүдые бэелүүлгэ тухай элидхэбэ. Россиин Юрэнхылэгшэ бэелүүлэгдээгүй хэмжээ ябуулгануудаар һонирхобо.
«Алексей Самбуевич, юу бүтээжэ шадаагүйбта?», - гэжэ Владимир Путин уласай толгойлогшодо хандаба.
Шиидхэгдээгүй гол бэрхэшээлнүүдэй тоодо байгаали хамгаалгын, хатуу үлэгдэлнүүдэй талаар асуудалнуудые Алексей Цыденов нэрлэбэ: «Мүнөө дээрээ байгаали хамгаалгын ба хатуу үлэгдэлнүүдтэ хабаатай асуудалнууд шиидхэгдээдүй байна. Теэд бидэ энэ шэглэлээр хүдэлхэбди».
«Байгал далай руу муухай юумэн ороно гү?», - гэжэ Владимир Путин һураба.
«Сэбэрлэлгын түхеэрэлгэнүүдэй барилгада бэрхэшээлнүүд тохёолдоно. Тиихэдэ полигонуудай барилгада шиидхэгдээгүй асуудалнууд бии. Үндэһэтэнэй түсэлнүүдэй хэмжээндэ хүдэлхэбди. Мүнөөдэр энэ ехэ шухала бодолго, ойлгонобди», - гэжэ Буряад Уласай Толгойлогшо тэмдэглээ.
Һануулхада, 2024 ондо Улаан-Үдэдэ сэбэрлэлгын түхеэрэлгэнүүдые һэльбэн шэнэлхэ хэрэг 2026 оной эсэстэ дүүргэхэ шиидхэбэри абтаа һэн. Харин Северобайкальск хотын сэбэрлэлгын бодхолгонуудай һэльбэн шэнэлэлгэ 2025 ондо дүүргэхээр хараалагдана.
Эдэ объектнүүд дээрэ барилгын дүүрэхэ болзор хараадаа абан, ажалай журам баталаа.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
