Буряад Уласай Толгойлогшо Мурманск хотодо үнгэргэгдэһэн «Муравьев-Амурский 2030» гэһэн сессидэ хабаадаба

Мартын 26-да Мурманск хотодо уласхоорондын арктическа хуралдаанай хэмжээндэ «Муравьев-Амурский 2030: Арктикада ба Алас Дурнада тушаалаар дэбжэлгэ - хүсэтэйшүүлэй шэлэлгэ» гэһэн сесси үнгэргэгдэбэ. Буряад Уласай Толгойлогшо Алексей Цыденов хэмжээ ябуулгада хабаадаа.

— Гүрэнэй албан юрын ажал бэшэ. Эндэ элшэ хүсэтэй, һанаһанаа бүтээдэг, юумэ урагшань ябуулха эрмэлзэлтэй зон хэрэгтэй. Тиимэһээ түрэл нютагаа бусажа хүдэлхэ гээшэ тон шухала. Түрэһэн газарайнгаа онсолиг мэдэхэ эрхэтэд нютаг можодоо аша үрэтэйгөөр хүдэлжэ, ажабайдалай шанар дээшэлүүлхэ аргатай, - гэжэ Алексей Цыденов тэмдэглээ.

Буряад Уласай залуу мэргэжэлтэд «Муравьев-Амурский 2030» программада эдэбхитэйгээр хабаададаг. Һуралсалай гурбан жэлэй туршада Буряад ороной долоон ажаһуугша программада оролсоо. Тиин «Эсэгэ ороноо хамгаалагшад» гэжэ гүрэнэй жасын Буряад Уласай таһаг Илья Михалев ударидаа. Тэрэ программын түрүүшын ээлжээндэ һуража гараа. 2-дохи ээлжээндэ һураһан Тимур Гомбоев Буряад Уласай Хүдөө ажахын ба эдеэ хоолой сайдай орлогшоор томилогдоо. Мүнөө программын 3-дахи ээлжээндэ һураһан мэргэжэлтэдые Буряад Уласта хүлеэнэ.

Буряад Улас мүнөө жэлдэ конкурсда мэдүүлгэ үгэгшэдэй тоогоор түрүүшүүлэй тоодо ороно. Гүрэнэй бүхы нютаг можонуудһаа дүн хамта 5311 мэдүүлгэ ороо, тодорхойлбол, нэгэ һуурида 88 хүн болоно.