Буряад Уласта Юрэнхылэгшын академи түлөөлһэн эрхэтэй зургаан нээгдэбэ

Үнгэрһэн долоон хоногто Буряад Уласай Толгойлогшо Алексей Цыденов РАНХиГС-ай  проректор Александр Ефремовтэй, Нютаг можын һужаа хүгжөөлгын дирекциин захирал Аркадий Эмексузянтай уулзаба. Буряад Уласай Засагай газартай баталагдаһан хамтын ажаябуулгын хэлсээнэй хэмжээндэ Юрэнхылэгшын академи түлөөлһэн эрхэтэй зургаан нээгдэбэ.

 «Мүнөө манай гүрэнэй ба муниципальна албанай ажалтад саг соогоо һуралсал гараха, мэргэжэлээ дээшэлүүлхэ, аша үрэтэйгөөр хүдэлхэ шэнэ эрдэм мэдэсэтэй болохо аргатай. Буряадай гүрэнэй университедтэй, Зүүн Сибириин гүрэнэй Технологиин ба хүтэлбэриин университедтэй, Буряадай гүрэнэй хүдөө ажахын академитэй хэлсээтэй хүдэлхэ хэрэгтэ  онсо анхарал хандуулагдадаг. Саашадаа хамтын программануудые бэелүүлхэ түсэб бии. Багшанарай хүгжэлтын, нэгэ доро хоёр дипломтойгоор ехэ һургуули дүүргэхэ талаар ажал ябуулхабди. Эдэ бүгэдэ гүрэнэй хүтэлбэриин, экономикын ба олзын хэрэгэй һалбаринуудта ургаха хүсэлтэй залуушуулда шэнэ арга боломжонуудые нээнэ», - гэжэ Буряад Уласай Толгойлогшо уулзалгын дүнгөөр хөөрэбэ.

Уулзалгада хабаадагшад академиин дурадхаһан асуултын системэ, мэргэжэлтэдэй шадабари шадалай сэгнэлтэ тухай зүбшэн хэлсээ. Талаан бэлигтэй мэргэжэлтэдые элирүүлхэ, тэдэнэй ургалтын оршон байгуулха хэрэгтэ эн асуудал тон туһатай.

 «Жэл бүри бидэндэ 270 000 гаран оюутад ба шагнагшад дээдэ ба мэргэжэлтэ, нэмэлтэ болбосоролой программануудаар һурадаг. Академи гүрэнэй политика  бэелүүлгын түб болоно. Гүрэнэй ба муниципальна албануудай мэргэжэлтэдые бэлдэхын тула уласай Засагай газартай хэлсээтэй ажалаа ябуулха шухала. Манда һайн, мүнөө сагай эрилтэдэ таарама программанууд бии. Болбосоролой хүгжэлтэ шухала асуудал, тиимэһээ энэ хэрэгтэ хабаадажа, туһа үзүүлхэ хүсэлтэйбди, уласай ехэ һургуулинуудтай дүтэ харилсан хүдэлхэ түсэб табинабди, - гэжэ РАНХиГС-ын проректор Александр Ефремов тэмдэглэбэ.