Буряад Уласай нютагай засагай алба хаагшад бүхэроссиин «Служение» шангай номинантнууд болобо

Апрелиин 21-дэ Владимир Путин «Түрэһэн нютаг- Россиин хүсэн» гэһэн бүхэроссиин нютагай засагай хуралдаанда хабаадагшадатай - Оросой Холбоото Уласай субъектнүүдэй нютагай засагай байгууламжануудай толгойлогшонортой уулзаба. Хэмжээ ябуулгада Сэлэнгын аймагай толгойлогшо, «Буряад Уласай нютагай байгууламжануудай зүблэл» гэһэн эблэлэй түрүүлэгшэ Станислав Дашиев хабаадаба. Хуралдаанай хэмжээндэ бүхэроссиин «Служение» гэһэн шан барюулагдаа. Закаменск хотын Владислав Киреев, Северобайкальскын Елена Данзанова гэгшэд шангай  номинантнууд болобо.

Апрелиин 21-дэ Росси гүрэн дотор нютагай өөһэдын хүтэлбэриин үдэр тэмдэглэгдээ. Энэл үдэр Москвада һайндэртэ зорюулагдаһан бүхэроссиин «Түрэһэн нютаг - Россиин хүсэн» гэһэн нютагай засагай хуралдаан болоо. Россиин Юрэнхылэгшэ Владимир Путин хабаадагшадые мэндэшэлэн амаршалаа.

- Таанад бэлэн бэшэ, гэхэтэй хамта, сэнтэй ажалда бэеэ зорюулнат. Арад зон үдэр бүриин бэрхэшээлнүүдые шиидхэхэеэ нэн түрүүн таанадта хандана, һайн тээшээ хубилалтанууд таанадһаа эхитэй гэжэ найдана. Нютагай засагай хэмжээндэ хүдэлхэ гээшэ ехэ харюусалга ба бодото шадабари, гүрэндэ ба манай ниигэмдэ алба хаалгын шухала табилан болоно, - гэжэ Владимир Путин тэмдэглээ.

   Бүхэроссиин «Служение» гэһэн шанда хүртэхын түлөө 42000 гаран хүн мэдүүлгэ эльгээһэн байна. Хуралдаанай үедэ шагналнуудые барюулба. Буряад Уласай мэргэжэлтэд 100 эрхимүүдэй тоодо ороо.

- Нютагай засагта хүдэлжэ байһан суг ажалтанаа амаршалжа, бэеын энхэ элүүрые, хүсэ шадал хүсэнэб. Эхэ орондоо үнэн сэхээр алба хаажа, олоной хүндэдэ хүртөөт. «Служение» шангай номинант болоһон мэргэжэлтэдээ амаршалнаб, баяр хүргэнэб, дэмжэнэб. «Залуу мэргэжэлтэд гүрэнэй албанда» янзада «Амгалан сагай баатарнууд» гэһэн хүдэлмэри эльгээһэн Закаменск хотын Кеер Владислав Вячеславович шалгараа. «Гэр бүлын амгалан байдал – гүрэнэй түрүүлэл» янзада Северобайкальскын Данзанова Елена Михайловна тодороо, - гэжэ Буряад Уласай Толгойлогшын ба Засагай газарай Захиргаанай хүтэлбэрилэгшын уялга саг зуура дүүргэгшэ Михаил Харитонов тэмдэглээ.

Энэ үдэр Россиин Юрэнхылэгшэ нютагай засагай байгууламжануудай толгойлогшонортой заншалта уулзалга үнгэргэбэ.

 - Манда зүбшэн хэлсэхэ асуудалнууд олон, мэдэнэб. Танай дурадхалнуудые, үүсхэлнүүдые аша үрэтэйгөөр, түргэн бэелүүлхэ талаар туһаламжа үзүүлхэб, - гэжэ Владимир Путин уулзалгын эхиндэ хэлэбэ.

Аймагуудай ба хотонуудай толгойлогшонор гүрэнэй Юрэнхылэгшэдэ асуудалнуудые табяа, ажалайнгаа амжалтануудтай хубаалдаа. Хэмжээ ябуулгада хабаадагшадай дунда Сэлэнгын аймагай толгойлогшо, «Буряад Уласай нютагай байгууламжануудай зүблэл» гэһэн эблэлэй түрүүлэгшэ Станислав Дашиев байгаа.

- Россиин Юрэнхылэгшэ Владимир Владимирович Путин Эхэ орондоо үнэн сэхээр алба хаалгын бодото жэшээ харуулна. Засагай бүхы хэмжээндэ ажаллажа байһан мэргэжэлтэд Росси гүрэнэйнгөө һалбархын тула эрдэм мэдэсэеэ, хүсэ шадалаа үгэнэ. Уулзалга дээрэ манай ажалда хабаатай олон асуудалнууд харагдаа. Эдэ асуудалнууд гүрэнэй хэмжээнэй шиидхэбэринүүдэй үндэһэ һуури боложо, манай ороной хүгжэлтэдэ нүлөөлхэ, һуурин тосхонгуудта таатай зохид оршон байгуулхада туһалха, - гэжэ Станислав Гармаев хөөрэбэ.