гэлдэжэ байжа, “манай гахай таргалха болтогой” гэжэ нэмэн, ехэл хүхилдэдэг, угаа ехэ һайндэр анхан болодог бэлэй. Мүнөө хэды һалхитай, хүйтэншэг үдэрэй (энэл үглөөгүүрнь саһа бордоһон болоо һэн) дайралдабашье, Улаан-Үдын Соведүүдэй талмай дээрэ хүн зон нёдондонойхиһоо үсөөн суглараашье һаа, булта хүхюун, дорюунууд болонхой, тэсэмгэйгээр хүлеэжэ байба. Олон ондоо партиин түлөөлэгшэд, профсоюзуудай эмхинүүдэй зон өөһэд өөһэдынгөө тугуудые баринхай ерээд байгаа һэн.
Буряад Республикын Профсоюзуудай нэгэдэлэй түрүүлэгшэ Анатолий Голых амаршалгын үгэнүүдые хэлэжэ, “Байгша ондо бүхы Росси соо Майн 1-нэй хэмжээ ябуулга “Достойный труд – справедливая зарплата” гэһэн уряа доро үнгэрнэ, тиимэһээ манай профсоюзна эмхинүүд ажалша арад түмэнэй ажалай түлөө һайн түлбэри түлүүлхын түлөө, үнэн сэхэ социальна найдалгануудай түлөө тэмсэнэ” гэжэ тэмдэглээ. “Хабартаа бүхы юумэн, тэрэ тоодо байгаали һэргэнэ гээшэ. Манай Росси гүрэндэ олон һайн хубилалтанууд болоно. Россидаа Крым ба Севастополь бусаа. Манһаа тэдэнэй хэды холошье һаа, бидэ тэдээнтэй нягта холбоотойбди. Эдэ үйлэ хэрэгүүд манда омогорхол түрүүлнэ, тиигээдшье манай гүрэниие мүнөө бүхы дэлхэй дээрэ тоодог болоо бшуу” гэжэ эндэ сугларагшадые амаршалха зуураа республикын Правительствын Түрүүлэгшын 1-дэхи орлогшо Иннокентий Егоров онсолһон байна.
Хабарай болон ажалай һайндэртэ сугларһан зониие Буряад Республикын Арадай Хуралай Түрүүлэгшэ Матвей Гершевич, Улаан-Үдэ хотын мэр Александр Голков гэгшэд хани халуунаар амаршалба, ажалдань, ажабайдалдань амжалта хүсэбэ. Промышленна предприятинуудай зүгһөө “Улан-Удэстальмост” ЗАО-гой дарга Александр Васильев амаршалгын үгэнүүдые хэлэхэдээ, олон предприятинуудай, тэрэ тоодо ЗАО-гой түхеэрэлгэнүүд хуушараа, бэрхэ мэргэжэлтэд, бусад кадрнууд дуталдана гэжэ тэмдэглэһэн байна.
Хүйтэн уларилые хүхюу хатарнуудаараа, дуунуудаараа дулааруулһан, эндэ сугларагшадай зүрхэ сэдьхэл хайлуулһан уран һайханай коллективүүд энэ һайндэрые шэмэглэбэ. Мэргэжэлтэ дуу, хатарай “Забава” гэһэн ород, хасаг арадуудай искусствын театр, “Тоонто” гэһэн арадай фольклорно ансамбль, “Лаккитон” гэһэн эстрадна бүлэг, Валико Гаспарян, Чингис Раднаев, эдирхэн Натали Дарпинян, “Семейские янтари” гэһэн шэмээшэгүүдэй ансамбль, хүүгэдэй искусствын һургуулинуудай хатаршадай, “Стекольские сударушки”, “Угол зрения” ансамбльнууд болон бусад уран бэлигээ дэлгээ.
Радна-Нима Базаровай фото