449
Хойшолонгуудынь тобойсо гаража ерэнхэй. Ажаһуугшадай 520 гэр байра, 269 зуһалан, 197 хашаа хорёо доторхи байшан, 66 авто-унаа дахинаа һэргээгдэхээр бэшэ юм. Тиихэдэ 4000-аад үхэр мал хохидоо. Түмэр зам болон автомашинын харгынууд угаагдаа, таряалангууд сохюулаа. Ехэ уһанай ерэһэнһээ боложо, 25 харгын гэнэ ушарнууд болоо. Арахангайн Хашаат нютагта зайн галай утаһануудай 5 бахана унаа, мүнөөдөө заһабарилгын ажал хэгдэнэ. Байгаалиин үзэгдэлһөө үшөө һэргэг байгты, аадар бороон орожо, гол мүрэн уһаар дүүрэхэдээ болохо гэжэ уларил шэнжэлэгшэд мэдээсэһэн байха юм.
Гэхэтэй хамта, манай Буряад орондо мүн лэ бэрхэтэйшэг болонхой. Ушарынь гэхэдэ, Монголһоо эхитэй Сэлэнгэ мүрэмнай үдэрһөө үдэртэ нэмэжэ байна. Улаан-Үдын ажаһуугшад яһала һэргэг. Энэ асуудал онсо хараа доро гэжэ хотын захиргаанай мэргэжэлтэд дуулгана.
- Сэлэнгэ мүрэн августын 15-ай байдалаар 1 см дээшэлээд, 246 см болонхой. Тиихэдэнь Үдэ голой уһан 1 см бага болоод, 193 см харуулна. Сэлэнгын уһанай үшөө 16 сантиметрээр дээшэлбэл, эрье хүбөөһөө гараха зэргэтэй. Августын 7-һоо эхилжэ, Сэлэнгэ мүрэн нэмэжэ эхилээ, - гэжэ хотын захиргаанда дуулгана.
Үнэхөөрөө, байгаалитай хэншье хэлсээтэй бэшэ. Хото һууринуудаар уһанай үерлэхэдэ, гарадаг газарнуудаар эрье хүбөөгынь дээшэлүүлжэ, ажаһуугшадайнгаа байрануудые абархаһаа ондоо юумэн үгы. Сэлэнгын эрьеэр баригдаһан иимэ хэрэгсэлнүүд хэр зэргэ ехэ уһанһаа ажаһуугшадаа аршалхаб?
Автор: Булат БАДМАЕВ
