534
Владимир Цырендондокович Ширапов 1970 оной апрелиин 1-дэ Хэжэнгын аймагай Хүртэй нютагта түрэһэн. 1996 ондо Зүүн-Сибириин соёлой академи «Драматическа бүлгэмэй хүтэлбэрилэгшэ» гэһэн мэргэжэлээр түгэсхэжэ гараһан байгаа. Мүн тиихэдэ Москвада МГУКИ-да кино буулгаха курсануудта һуража гараһан.
Владимир Цырендондокович 1994 онһоо Саха Яхадай телевиденидэ ажаллажа эхилһэн. Һүүлээрнь «Ариг Ус» телекомпанида найруулагшаар, дамжуулга бэлдэгшээр ажаллаа. 2015 онһоо хойшо хубиин «Yндэр» гэжэ нэрэтэй видеостуди байгуулжа, тэндээл хүтэлбэрилэгшөөр ажаллажа байгаа.
Бэлдэһэн кино буулгабаринууд соогоо Владимир Цырендондокович түрэл оронойнгоо байгаали, ажалша малша арад зоноо, шадамар бэрхэ, урагшаа һанаатай хүнүүдээ магтан түүрээжэ харуулдаг һэн. Кино бүхэниинь өөрын дабтагдашагүй онсотой, шэмэ шүүһэтэй, хүмүүжүүлгын, һуралсалай удхатай.
В.Ц. Ширапов Буряад Уласай Засагай газартай нягта холбоотойгоор ажаллаа. Тиигэжэ Уласай Болбосоролой болон эрдэм ухаанай яаманай захилаар «Намилзаһан сагай харуулшад» - «Стражи трепещущего времени» нэрэтэй дамжуулгануудые бэлдээ. Тэрэ дамжуулга соогоо буряад хэлэнэй багшанарай ажал тухай харуулагша һэн. Эхэ оронойнгоо эрхим хүбүүдэй нэгэн Владимир Ширапов дамжуулга бүхэн дээрээ ехэ харюусалгатайгаар ажалладаг байгаа.
В.Ц. Ширапов Солбон Лыгденовэй «Булаг» гэһэн кинодо гол роль гүйсэдхэжэ, олоной һайшаалда хүртэһэн юм. Һүүлээрнь «Шаман» гэһэн кинодо баһа удхатай рольдо наадаа. Һаяхана буулгагдажа байгаа «Коралловые бусы» фильмдэ баһа наадажа үрдеэ.
Владимир Цырендондокович – «Бэлигэй зам – хүндэ зам/ «Прозрение» гэһэн фильмын найруулгын ажалай түлөө 2019 ондо Чебоксары хотодо үнгэрһэн Уласхоорондын XII конкурсын лауреат; «Газарай амисхал» видеофильмын түлөө Бүхэроссиин үндэһэтэнэй кинонуудай конкурсын 3-дахи шатын лауреат.
В.Ц. Ширапов найдамтай нүхэр, аба, аха, нагаса байгаал даа. Сагаан һанаатай, сэхэ һайхан бодолтой, урагшаа зоримгой Владимир Цырендондокович Ширапов буряад зоной зүрхэ сэдьхэлдэ тэрэл зандаа үлэхэ.
Нүхэдынь, суг ажалладаг нүхэдынь
