1141
- «Үе үеын зоной бэе бэеэ дэмжэн нэгэдэлгэ» гэһэн үзэсхэлэн- яармаг фестивалиин талмайнуудай нэгэн болохо. Эндэ дүн хамта 9 үзэсхэлэн дэлгээгдэхэ. Тэдэнэй нэгэниинь бэеын энхэ элүүртэ зорюулагдаха, нүгөөдэнь - эрдэм һуралсалда. Тэмдэглэхэ зүйл гэхэдэ, «Демографи» гэжэ үндэһэн түсэл наһатай зондо туһатай. Олон янзын программануудай ашаар тэдэ түлбэригүйгөөр мэдэсэ шадабарияа дээшэлүүлхэһээ гадна, ондоо мэргэжэл абаха аргатай. Олзын хэрэг эрхилжэшье болоно, - гэжэ Буряад Уласай хүн зониие ниигэмэй талаар хамгаалгын сайд Татьяна Быкова тэмдэглэбэ.
Мүнөөдэр Буряад Уласта наһанай амаралтада гараһан 180 мянган үбгэд хүгшэд тоологдоно. Тэдэнэй хүн бүхэниинь өөртөө таарама ажал олохо аргатай. Гадна һуралсал гаража, ондоо мэргэжэлтэйшье болохоор. Үгы гэбэл, һайн дуратанай бүлгэмүүдтэ орохо арга боломжо үгтэнэ. Түрэл нютагаа шэнжэлхэеэ һанабал, аяншалхадашье болохо. «Наһанай алтан хаһа» гэһэн фестиваль үбгэд хүгшэдэй сэдьхэлдээ таарама хэрэг шэлэн абалгада туһалха үүргэтэй.
Яармагай хэмжээндэ «Ниигэм ба гүрэн», «Гоо һайхан ба мода», «Мүнгэн зөөри ба эрхэ», «Амаралга ба аяншалга» гэхэ мэтэ хэдэн талмайнууд ажалаа ябуулха. Гадна лекцинүүд, мастер-классууд, семинарнууд, соёлой программанууд, эд бараанай наймаашье дурадхагдаха.
Автор: Янжима ДАРМАЕВА бэлдэбэ
