![](/upload/resize_cache/iblock/a24/780_780_1/a24346e1acb8370cad85f1829f8ae336.jpg)
Европын Кубогта хүртэхын түлөө һур харбалгаар мүрысөөнэй хоёрдохи шатада залуушуулай хоёр бүлэгтэ оролсоһон Буряадай тамиршад дүрбэн медальда хүртөө.
Хубиин тоосоондо Сергей Шенхоров блочно номо һуршаар харбахадаа, чемпион болохын түлөө Норвегиин, Швейцариин, Италиин болон Эстониин тамиршадые шүүжэ гараа. Һаяхана тэрэ уласхоорондын классай спортын мастер гэһэн үндэр нэрэ зэргэдэ хүртөө һэн.
Руслан Серебряков III һуури эзэлхэдээ, табан тамиршадые илаа. Гансал Франциин түлөөлэгшэдэ шүүгдээ.
Командна тоосоондо Виктория Харитонова Ростовой можын Екатерина Бирюкова болон Москвагай Нуриниссо Махмудова гэгшэдтэй Ородой суглуулагдамал командые бүридхэжэ, шангай III һуурида гараа.
Түнхэнһөө гарбалтай, мүнөө Москвада һуралсалаа үргэлжэлүүлжэ байдаг Найдан Сушкеев командна тоосоондо шангай II һуури эзэлээ. Үбэр Байгал хизаарай Содном Будаев болон Башкортостан Уласай Станислав Черемискин гэгшэдтэй хамта ганса Нидерландын тамиршадта булигдаа.
Дээрэ нэрлэгдэһэн тамиршад 1999-2001 онуудта түрэһэн хабаадагшадай наһанай бүлэгтэ шалгараа гээд хэлэлтэй.
2002-2005 онуудай тамиршадай дунда Буряадай түлөөлэгшэд үшөө хоёр медальда хүртөө. Командна тоосоондо Буряадаймнай Бато Доржиев, Үбэр Байгал хизаарай Буянто Осоров болон Свердловско можын Артем Русин гэгшэд дүрбэн спарринг уулзалгада 6:0 гэһэн тоотойгоор илалтануудые туйлаһан байна.
Мэдээжэ һоригшо Цыденбал Тогошиевич Цыренжаповай зээ басаган Алина Дашеева мүнөө Москвада һуралсалаа үргэлжэлүүлнэ. Ородой суглуулагдамал командын бүридэлдэ оруулагдажа, Үбэр Байгалай хизаарай Туяна Будажапова болон Краснодарска хизаарай Полина Крикунова гэгшэдтэй хамта Алина шангай II һуури эзэлһэн байна.
Залуу тамиршаднай гэртээ бусажа, мүнөөдэр Улаан-Үдэдэ эхилһэн “Байгалай годлинууд” гэһэн бүхэ- россиин мүрысөөндэ хабаадана.
Автор: Борис БАЛДАНОВ бэлдэбэ