​Шэнэ бүридэлдэ шэлэн абтаха гү?

Эхэнэрнүүдэй болон эрэшүүлэй суглуулагдамал команданууд шэнээр бүридхэгдэхэ гэжэ Ородой Боксын федерациин нарин бэшэгшэ Умар Кремлёв мэдүүлбэ. 

Лондон хотодо Олимпиин наадануудта шэлэн абалгын мүрысөөн март һарада гурбан үдэрэй туршада болоһоной удаа зогсогдоо һэн гээд һануулая. Зарим Ородой тамиршад ринг дээрэ гаража үрдиһэн байна, нүгөө заримашуулынь мүрысөөндэ хабаадаагүй.

- Олимпиин наадануудта шэлэн абалгын мүрысөөн 2021 ондо болохоор түсэблэгдөө. Тиимэһээ бидэ командаяа шэнээр бүридхэхэ һанаатайбди. Намартаа үнгэргэгдэхэ Ородой чемпионадуудта хэн ямар бэлэдхэлтэй байнаб гэжэ харахабди. Тус мүрысөөнэй дүнгүүдээр команда бүридхэгдэхэ, - гэжэ Умар Кремлёв ойлгуулаа. 

Буряадай тамиршан Людмила Воронцова Лондон ошоһон аад, нэгэшье уулзалга үнгэргөөгүй. Командын бүридэлдэ Наталья Шадрина болон Дарима Сандакова гэгшэд оруулагдабашье, өөр өөрын шэгнүүртэ II һуурида байгаа. 

Ородой чемпионадай һүүлдэ Буряадай тамиршад олоороо суглуулагдамал командын бүридэлдэ оруулагдажа, Олимпиадада хабаадаха арга боломжодо хүртэхэ. 

Спортын бэлэдхэлэй түбэй ахамад һоригшо Доржо Шаргакшановай хэлэһээр, Батор Сагалуев командада оруулагдаха арга боломжодо баһа хүртэхэнь. 2019 онһоо хойшо Батор 52 килограммай шэгнүүртэ шаасалдадаг болонхой. Урда жэлнүүдтэ тэрэ 49 килограммай шэгнүүртэ хабаададаг байгаа һэн гээд һануулая. 

52 килограмм шэгнүүртэй Дагестанай Расул Салиев Лондондо 2-дохи уулзалгадаа шүүгдэшэһэн байна. Мүнөө сагта Саха-Яхад Уласай Василий Егоров, Крымэй Василий Кудряков гэгшэд командын бүридэлдэ оруулагданхай. Харин Ородой чемпионадта Батор Сагалуев чемпионой нэрэ зэргэдэ хүртэбэл, командын бүридэлдэ оруулагдаха байна. Мүн шангай һуурида гараа һаань, хэншье тэрэниие харахагүй.