​Ерэхэ халаанда түсэб ехэ

Ородой санаар урилдаанай суглуулагдамал командын һоригшод ба хүтэлбэрилэгшэд 2020-2021 онуудай халаанай түсэб табиба. Командын бүридэлдэ 39 тамиршан оруулагдажа, бэлэдхэлгын һорилгодо хабаадуулагдахаар хараалагдана. Тэдэнэй тоодо Буряадай санашан Алиса Жамбалова байха юм. 

Алиса Жамбалова мэдээжэ һоригшо Маркус Крамерай ударидалга доро 3-дахи жэлээ хүдэлхэнь. Немец мэргэжэлтэнэй бүлэгтэ үшөө Сергей Турышев һорилго хэдэг. Мүнөө жэлдэ тус бүлэгтэ 9 санашан оруулагдаа. Эдэ хэд бэ гэбэл, Евгений Белов (Тюменскэ можо), Иван Кириллов (ХМАО-Югра), Артём Мальцев (Нижегородско можо/Мордови Улас), Глеб Ретивых (Тюменскэ можо), Сергей Устюгов (ХМАО-Югра), Алиса Жамбалова (Буряад Улас), Анастасия Кулешова (Седова) (Нижегородско можо/Мордови Улас), Юлия Ступак (Белорукова) (Коми Улас), Майя Якунина (Калужска можо) гэгшэд болоно. Суглуулагдамал командын гэшүүдтэй хамта үшөө 5 бүлэг һоригшод хүдэлнэ гээд хэлэхэ хэрэгтэй. Буряадһаа гарбалтай, мүнөө Хакаси Уласта ажаһуудаг Диана Головань командын бүридэлһөө гаргагдаһан байна. 

2019-2020 онуудай үбэлэй халаанда Ородой тамиршад сооһоо эгээл эрхим дүнгүүдые Наталья Непряева харуулаа. Манай Алиса Жамбалова шангай һууринуудые эзэлжэ шадаагүйшье һаа, дэлхэйн түрүү 25 тамиршанай тоодо ороһон байна. Ородой тамиршадай дунда энэ 2-дохи дүн гээд ойлгуулха хэрэгтэй. 

2020-2021 онуудай халаан ехэ харюусалгатай боложо үгэнэ. Юуб гэхэдэ, 2022 ондо үнгэргэгдэхэ үбэлэй Олимпиин наадануудай урдахи халаан гээшэ. Гэхэтэй хамта дэлхэйн чемпионат болохоор хараалагданхай. 

Мүнөө халаанда эхэнэрнүүдэй дунда үрдилдэн тэмсэлгэ ехэ байхаар һанагдана. Юуб гэхэдэ, урдахи халаанда мүрысөөнүүдтэ хабаадаагүй түрүү санаша басагад саг зуурын амаралтын удаа спортдоо бусаба. Анастасия Кулешова (Седова), Юлия Ступак (Белорукова) болон Елена Устюгова (Соболева) гэгшэд мүнөө үбэлдөө үхибүүтэй болоо. Ородой Спортын яаман үбэлэй спортын зүйлнүүдээр федерацинуудта шэлэн абалгагүйгөөр командануудаа бүридхэхэ тухай даабари үгөө. Март һарын һүүл багаар спортын хэдэн зүйлөөр Ородой чемпионадууд болохо аад, мэдээжэ шалтагаанһаа боложо болюулагдаа һэн. Спортын федерацинуудһаа эгээл түрүүн санашад командаяа бүридхэбэ гээшэ. 

Апрелиин 20-до түрэһэн үдэрөө тэмдэглэһэн Санын спортын федерациин хүтэлбэрилэгшэ, мэдээжэ тамиршан Елена Вяльбе гэгшын хэлэһээр, ээлжээтэ халаанда бэлэдхэл майн дундуур эхилхэ юм.

Буряад Уласай мэдээсэлэй албанай гэрэл зураг