​​Буряадай Толгойлогшын шангуудта хүртэхын түлөө “Байкал Оpen” гэһэн уласхоорондын мүрысөөн болюулагдаба

Мартын 5-7-ой үдэрнүүдтэ үнгэргэгдэхэеэ байһан барилдаагаар Буряад Уласай Толгойлогшын шангуудта хүртэхын түлөө “БайкалОпен” гэһэн уласхоорондын мүрысөөн болюулагдаба. Буряад Уласай спортын болон залуушуулай хэрэгүүдэй талаар сайд Вячеслав Дамдинцуруновай мэдээсэһээр, мүнөө жэлдэ тус мүрысөөн болохогүй.

Хитадта эхиеэ абажа, бүхы дэлхэйгээр һүжэрһэн коронавирус гол шалтагааниинь болоно гээд хэлэлтэй.

- Ород гүрэнэй дэбисхэр дээрэ, илангаяа Буряадта коронавирус үгы гэжэ мэдэнэбди. Хэды тиигэбэшье тус мүрысөөндэ хабаадахаяа ерэһэн хари гүрэнүүдэй түлөөлэгшэд энэ муухай үбшэ асаржа магад, - гэжэ спортын сайд хэлэнэ.

Мүнөө жэлэй мүрысөөн 25-дахияа үнгэргэгдэхэ байгаа. Тиимэһээ олон тоото хари гүрэнүүдэй болон Ородой можо, хизаарнуудай тамиршад Улаан-Үдэ ерэхэ тухайгаа уридшалан мэдүүлһэн байна. Тэдэнэй зариманиинь Москва хүрөөд байгаа, нүгөө зариманиинь поездоор Буряад орон хүрэжэ ябаа.

Сайдай мэдээсэһээр, Буряадай барилдаашадай бэлэдхэл болон һорилго таһалдаба. Энэ ушараар тамиршадые һайн бэлэдхэл гарахынь түлөө ондоо регионууд руу эльгээхэеэ байһанаа Вячеслав Дамдинцурунов дуулгаа.

Улаан-Үдэдэ болохо эрэшүүлэй дунда Ородой чемпионат болохо болзортоо үнгэргэгдэхөөр хараалагданхай.

Анна ОГОРОДНИГОЙ гэрэл зураг