480
Буряад Уласай ниислэлдэ 2012 ондо тамирай ехэ комплекс ашаглалгада тушаагдаһан байна. Тэрээндэ ямар бэ даа зохид нэрэ үгэхэ тухай хөөрэлдөөн үргэлжэлһөөр. Энэшье удаа Буряад Уласай Арадай Хуралда тэрээн тухай хэлсэгдээ. Харин эндэ оройдоол нэгэ асуудал табигдаа. “Боксоор олимпиин чемпион Владимир Сафроновой нэрэ ФСК-да олгуулха тухай” гэһэн хөөрэлдөөндэ ганса арадай һунгамалнууд бэшэ, мүн юрын хүнүүд хабаадахаяа уригдаа.
Владимир Сафронов
Суглаа зарлаһан Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ Валерий Доржиевай хэлэһээр, олимпиин абаргын нэрэ олгуулха тухай асуудал олон жэлдэ табигдана.
- Манай түүхэшэд, спортын олонхи ветеранууд эгээл түрүүн тус асуудал бодхоогоо. ФСК-да ганса боксын мүрысөөнүүд болоно бэшэ, эндэ бүхы томо хэмжээ ябуулганууд үнгэргэгдэнэ ха юм гээд, хэлсээн болюулагда һан байна, - гэжэ Валерий Доржиев хэлэнэ.
2019 ондо шэнээр энэ асуудал бодхоогдожо эхилээ. Юуб гэхэдэ, суутай боксёрой 85 жэлэй ой тэмдэглэгдээ. Владимир Сафронов Буряадай түүхэдэ оройдоол ори ганса олимпиин абарга болоно гээшэ. Тэрэ 1956 ондо Мельбурн хотодо шалгараа. Мүнөөшье болотор Буряадай тамиршад иимэ үндэр амжалта туйлаагүй. Хэды тиигэбэшье тэрээн тухай үсөөн хүн мэдэдэг байһандань харамтай. Һүүлэй 20 жэлдэ боксдо ябадаг тамиршадшье Владимир Сафроновые мэдэнэгүй гээд хэлэгдээ.
- Буряад орондомнай Олимпиин наадануудай орьёлдо хүрэһэн хүнүүд хомор. Харин абарга болоһон хүн ганса. Энэмнай Владимир Сафронов болоно. Бүхы арад зон нютагайнгаа геройе мэдэхын түлөө нэрыень ФСК-да олгуулха хэрэгтэй, - гэжэ спортын түүхэ шэнжэлдэг Владимир Фомин тэмдэглэнэ.
Борис Будаев
Буряадай Барилдаанай федерациин хүтэлбэрилэгшэ, Улаан- Үдэ хотын Һунгамалнуудай зүблэлэй түрүүлэгшэ Чимит Бальжинимаев ондоо дурадхал оруулаа. Тэрэнэй һанамжаар, ФСК- да мэдээжэ барилдаашан Борис Будаевай нэрэ олгохо хэрэгтэй. Энээниие олон һунгамалнууд дэмжээ.
- Өөрөө би үнинэй тамиршадай дунда ябанаб. Барилдаад, спортын мастер болооб. Манай нюдэн доро Борис Будаев хүдөөһөө ерэжэ, аргагүйгөөр оролдожо, дэлхэйн абарга болотороо дээшээ урган гараа. Мүн барилдахаяа болёод, мүнөө болотор түрэл нютагтаа туһа нэмэритэй ябана, - гэжэ һунгамал Сергей Пашинский мэдүүлээ.
- Үйлсэдэ гараад, газаа гүйжэ ябаһан хүбүүдһээ: “Ши Владимир Сафроновые һайн мэдэхэ гүш, али Борис Будаевые гү? - гэжэ асуухадашни, харюунь эли байха. Манай мэдээжэ барилдаашан ха юм, - гэжэ һунгамал Михаил Гергенов хэлэнэ.
Арадай нэрэ
Буряадай Барилдаанай федерациин хүтэлбэрилэгшын нэгэдэхи орлогшо Вадим Бредний барилдаашан Борис Будаевые хэды дэмжэбэшье, манай уласта суутай, мэдээжэ һоригшод, тамиршад олон гээшэ. Тэдэнэй тоодо барилдаашан Олег Алексеев, һоригшо Игорь Марковец болон бусадай нэрэ дурдаа. Харин энэ суглаанда хабаадаһан һунгамал Игорь Марковецэй һанамжаар, хүнэй нэрэ ФСК- да бү үгэе гэжэ дурадхаа.
- Бүхы уласаймнай спортын болон соёлой талмай ха юм. Тиимэһээ тамиршадай болон һоригшодой нэрэ үгэхэ хэрэггүй. ФСК-да арад зониие нэгэдүүлһэн, нютагаймнай онсо шэнжэ харуулһан нэрэ үгэхэ хэрэгтэй, - гэжэ Игорь Марковец мэдүүлээ.
Һунгамалай һанамжа дэмжэһэн олон хүнүүд Интернет сүлжээндэ өөрын нэрэнүүдые дурадхаа. “Бурятия арена”, “Тамир”, “Батор”, “Абай Гэсэр арена”, “Байкал арена” гэхэ мэтэ нэрэнүүд дурадхагдана. Суглаанда хабаадаһан заримашуулай хэлэһээр, “Буряадай спортын геройнууд” гү, али Буряадай олимпиецүүдэй нэрэмжэтэ гээд хэлээ һаа, тааруу байгаа.
Олоной һанамжаар, спортын бүхы танхимуудые хэнэйб даа нэрээр нэрлэхэ хэрэгтэй. Үшөө баригдажа эхилээгүй байхадань нэрлэбэл, һайн байгаа гээд һанагдана.
Спортын талмайнууд дээрэ хүлһөө адхажа, Буряад ороноо суурхуулжа ябаһан тамиршадайнгаа, һоригшодой нэрэ мүнхэлхын түлөө аллей, музейнүүдые нээхэ хэрэгтэй. Тиигэбэлнай хэмнай хэн бэ гэжэ арад зон ойлгожо байхал.
