​Эдэбхитэй һоригшын ашаар шатарай ээлжээтэ мүрысөөн Буряад Уласта түгэсэбэ

Шатарай ээлжээтэ мүрысөөн Буряад Уласта түгэсэбэ. Хүүгэдэй мэдээжэ һоригшо Хаян-Хирбэ Гармажапов тэрээниие эмхидхээ гээд хэлэлтэй.

Хаян-Хирбэ Гармажаповай шатарай багшаар хүдэлжэ эхилһээр 40 жэлэй ойдо зорюулагдаһан энэ мүрысөөн 5 шатаһаа бүридөө гээд һануулая. Һүүлшын шатын нааданууд августын 16-да болобошье, үнгэрһэн долоон хоногто тодоор дүнгүүд элирүүлэгдээ. Эмхидхэгшэдэй тэмдэглэһээр, тэдэ дүнгүүдые бүхы талаһаань хаража үзөө. Юуб гэхэдэ, зарим наадагшад шатарай тусхай электрон программа хэрэглэнэ. Энээнһээ боложо, ехэ рейтингтэй шатаршад доошоо унана. Тэдэ баллнуудые нэгэ үдэрөөр абажа шадахагүй гээд ойлгомоор. Тус шалтагаанһаа боложо, тамиршад иимэ мүрысөөнүүдтэ хабааданагүй ха юм.

Хэды тиигэбэшье, Хаян-Хирбэ Гармажаповай мүрысөөн олоной хабаадалгатайгаар үндэр хэмжээндэ эмхидхэгдээ гээд хэлэбэл, алдуу болохогүй.

“А” бүлэгтэ 1500 баллһаа бага рейтингтэйшүүл наадаа. Ехэ балл абагшад “Б” бүлэгтэ тулалдаа. Бүхы дээрээ 50 гаран хүн мүрысөөндэ оролсоһон байна бшуу.

“А” бүлэгтэ Гомбо Цыдыпов түрүүлжэ гараа. Тэрэ бүхы 5 шатын наадануудта хабаадажа, хоёр дахин I һуури эзэлээ. Үшөө тиихэдэ Гомбо хоёр дахин шангай II һуурида гараа. Янжима Маланова болон Матвей Гонгоров гэгшэд мүнгэн ба хүрэл медальнуудта хүртөө.

Һүүлшын наадан болотор шанга тулалдаан “Б” бүлэгтэ болоһон байна. Эрдэм Хубукшанов бүхы шатануудта эрхим гурбанай тоодо оролсоо, гурба дахин I һуурида гараа. Эдэ амжалтануудай ашаар Эрдэм түрүүшынгээ багшын гол шангуудта хүртэбэ гээшэ.

II һуурида баһа залуу шатаршан Влад Добшинов гараа. Бүхы наадануудта Влад һайн дүнгүүдые харуулаа, хоёр шатын үедэ үзүүрлээ. Булат Данзандоржиев хүрэл медаль абаба.

Эхэнэрнүүдэй дунда наадануудта эдир Номина Дармаева шалгараа. Татьяна Имыхелова, Кира Маланова гэгшэд шангай һуури эзэлжэ, мэдээжэ һоригшын шангуудые хубаалдаа.

Владимир Иринчинов аха захатан болохо ветерануудай дунда, Даша Дамбаев 10 наһа хүрөөдүй хүбүүдэй дунда бэлэг сэлэгүүдые абаа.

Хаян-Хирбэ Гармажапов хоёр мүрысөө онлайн аргаар шадамар бэрхээр эмхидхэжэ, нэгэ бага амтархаа гэхэдэ, алдуу болохогүй. Юуб гэхэдэ, шатарай багша үшөө нэгэ тулалдаа үнгэргэжэ байна. Буряад Уласай Шатарай федерациин түлөөлэгшэдэй дунда Хаян Сандакович эгээл ехэ эдэбхи үүсхэл гэртээ һууха гуримай үедэ гаргана гэхэдэ, алдуу болохогүй.