​Монголой даамшадай амжалта

Үнгэрһэн долоон хоногой эсэстэ “Арадуудай Кубок” гэһэн бүхэдэлхэйн мүрысөөн түгэсэбэ. Эндэ Ородой эрэшүүлэй суглуулагдамал команда түрүүлһэн байна. Монголой эхэнэрнүүд чемпионой нэрэ зэргэдэ хүртөө.

Арадуудай Кубогта хүртэхын түлөө наадануудта 28 эрэшүүлэй, 11 эхэнэрнүүдэй команданууд наадаа. Эхэнэрнүүдэй дунда тулалдаануудта команда бүхэн бэе бэетэеэ наадажа, түрүүшүүлые элирүүлээ. Удаань I ба II һууринуудые эзэлһэн команданууд хахад финалда хабаадаха эрхэдэ хүртөө. Удаадахи дүрбэн һуури эзэлэгшэд ¼ финалай наадануудта хабаадаа.

Түрүүшын шатада Ород гүрэнэй эхэнэрнүүд бүхы 10 нааданда илалта туйлажа түрүүлһэн байна. Украинын наадагшад II һуурида гараа. Беларусь Уласай, Монголой, Хитадай болон Латвиин даамшад 2-дохи шатада хабаадаха эрхэдэ хүртөө.

Хоёр нааданһаа бүридэһэн ¼ финалай шатада Монголой эхэнэрнүүд Хитадай командые 14:2 гэһэн тоотойгоор шүүгээ. Иимэ дүн нэгэшье мэргэжэлтэн хүлеэгээгүй.

Хахад финалай шатада Монголой наадагшад Ородой эхэнэрнүүдтэй уулзаа. Эндэ Улаан-Баатарһаа наадаһан даамшад ялас гэмэ амжалта туйлажа, шүүжэ гараа. 11:5 гэһэн тоотойгоор Монголой команда илажа гараха гэжэ хэншье һанаагүй.

Мүн финалдашье монголойхид “баатаршалгаяа” үргэлжэлүүлээ. Түрүүшын нааданда тэдэ Беларусь Уласай наадагшадые 5:3 гэһэн тоотойгоор шүүһэн байна. Хоёрдохи уулзалгада ана-мана тулалдаан хэдэн хюлгэ дээрэ болоо. 4:4 гэһэн тоотойгоор түгэсэһэн нааданай удаа Монголой даамшад чемпионой нэрэ зэргэдэ хүртөө.

Нааданууд 4 хюлгэ дээрэ үнгэрөө. Тиимэһээ команда бүхэн 8 наадагшые мүрысөөндэ табяа. Чемпион болоһон Монголой командын бүридэлдэ Мишээл Баяр, Хүслэн Энхболд, Хэрлэнмүрүн Ганбаа, Нямжаргал Мүнхбаатар, Мүнхжин Баатархүү, Лхагвадолгор Норовсүрэн, Нандинцэцэг Батдэлгэр, Анужин Баатархүү гэгшэд наадаа.

Эрэшүүлэй дунда финалда Ород гүрэнэй даамшад Украинын тамиршадтай уулзаа. Эндэ 11:5 гэһэн тоотойгоор Ородой наадагшад илалта туйлаа. Алексей Чижов, Александр Гетманский, Айнур Шайбаков, Николай Гермогенов, Иван Трофимов, Александр Верховых, Даниил Ильин болон Алексей Большаков гэгшэд шалгараа.