Буряад Уласай Толгойлогшо тамирай талмайнуудые шалгаба

Зургаан талмайнуудай табаниинь hайн шанартай, харин нэгэниинь тааруу, тиимэhээ дутуу дундануудые усадхаха тухай хэлсэгдэбэ.

Буряадай ойн ажахын колледжын дэргэдэхи спортын талмай ехэ муугаар хушагдажа, тэрэниие дахин шэнээр заhажа хушаха ажал гараба.

«2016-2020 онуудай туршада Ородой Холбоото Улас дотор «Физкультура болон спорт хүгжѳѳхэ» гэhэн программын ашаар Авиационно техникумэй, Буряадай багшанарай колледжын, Yндэhэтэнэй 1-дэхи лицей-интернадай дэргэдэ спортын талмайнууд баригдажа, ашаглалгада тушаагдаба.  Ивалгын аймагай Сотниково болон Ошурково тосхонуудта  «Демография» гэhэн үндэhэн түсэлэй «Спорт – норма жизни» гэhэн түсэбѳѳр  спортын талмайнууд баригдажа, тэндэ ажаhуугшад зохид талмайнуудтай болобо.

 Хамтадаа Буряадта нээмэл түхэлтэй 36 талмай баригдаа. Ородой Холбоото Уласай Юрэнхылэгшэ Владимир Путинай заабаряар бэелүүлэгдэжэ байhан «Демография» түсэлэй ашаар эдэ талмайнуудые барилгада 550 сая түхэриг дамжуулагдаhан байна. Мүльhэнэй ордон, Зүүн зүгэй спортын зүйлнүүдэй түб, Хоккей нааданай ехэ байшан, Һур харбалгын ордон барилга үргэлжэлhѳѳр. Ехэнхи талмайнууд hуралсалай эмхинүүдэй хажууда баригдабашье, тэрэ газарта ажаhуудаг зон эндэ ерэжэ, бэеэ hорихо аргатай байха ёhотой", - гээд Буряад Уласай Толгойлогшо Алексей Цыденов онсолно.

2020 ондо спортын шэнэ байшан болон талмай түхеэрхэ хэрэгтэ 600 сая түхэриг үгтэбэ. Яруунын аймагай Yльдэргэ, Гунда, Иисэнгэ нютагуудта, Хойто Байгалай Дээдэ Зэмхэдэ, Ивалгын аймагай Сотниково, Ошурково, Сужа тосхонуудта болон Хурамшада, Кабанскын аймагай Шэнэ Ёнхолог, Шигаево, Хүдэрэ, Оймуур нютагуудта, Мухар-Шэбэрэй Барта, Хориин аймагай түб Хори болон Тээгдэдэ, Захааминай агропромышленна техникумда болон дээдэ нэрлэгдэhэн hуралсалай дунда мэргэжэлэй эмхинүүдтэ спортын талмайнууд баригдаа. Бусад олон нютагуудта иимэ шэглэлтэй талмайнуудай барилга үргэлжэлhѳѳр.