Баярай нулимса

Үнгэрһэн долоон хоногой эсэстэ Ульяновск хотодо эхэнэрнүүдэй дунда боксоор чемпионат боложо түгэсөө. Тэрэнэй дүнгүүд Буряад Уласай ажаһуугшадта ехэ баяр асарба. Нютагаймнай басагад дүрбэн медаль абажа шадаа. Анха түрүүшынхиеэ чемпионой нэрэ зэргэдэ Дулма ЛУМБУНОВА хүртэжэ, олон тоото спортын мэргэжэлтэдые гайхуулһан байна.

Дулма Лумбунова Ульяновск хотын ринг дээрэ Москва хотын түлөө шаасалдаа. Хэды тиигэбэшье бүхы буряад угсаатан Сэлэнгэ аймагай Зургаан Дэбэ һууринай басаганай түлөө ехэл һанаата болоо.

Дулма хадаа мэдээжэ барилдаашан Зоригто Цырендондоповой болон буряад эстрадын одон Дарима Цырендондоповагай дүү, гэр бүлынгөө эгээл одхон басаган болоно бшуу. Хэнэй ашаар спортын харгы шэлээб гэжэ ойлгохоор.

Үшөө 10 наһашье хүрөөдүй ябаад, Дулма тхэквондогоор бэеэ һорижо эхилһэн байна. Түрүүшын багшань Эрдэни Дашиевич Жамбалов болоно. Улаан-Үдэдэ һургуулияа дүүргэтэрээ амжалтатайгаар мүрысөөнүүдтэ хабаадажа, Буряадаа суурхуулжа ябаа. Эдиршүүлэй болон залуушуулай наһанай бүлэгтэ Дулма Ородой чемпионадташье, Европын болон дэлхэйн мүрысөөнүүдтэ алтан, мүнгэн болон хүрэл медальнуудта хүртэһэн намтартай.

Москва хотодо һуралсалаа үргэлжэлүүлхэеэ ошоһон басаган бусад зүүн зүгэй тулалдаануудаар бэеэ һорижо эхилээ. 2019 ондо кикбоксингоор дэлхэйн чемпионадта мүнгэн медальда хүртөө һэн. Харин хажуугаарнь боксдо ябажа байгаа. Дүрбэн жэлэй хугасаада Дулма Москва хотын чемпионадта хэдэн дахин илалта туйлаа. Ородойшье чемпионадта хабаадаһан байха. Тиигэжэ мүнөө тон ехэ амжалтаяа туйлаба гээшэ.

Сэнхир экранаар финальна уулзалгануудые хараһан харагшадые ганса Дулма гайхуулаа бэшэ. Мүн дамжуулга хэһэн сурбалжалагша ехэл һонирхолтой зугаа дэлгээ.

Үнэхөөрөөшье, Дулма боксоор спортын мастерта кандидат юм. Оройдоол дүрбэн жэл һорилго хэнэ гэжэ нэгэтэ бэшэ дамжуулга бэлдэгшэ онсо тэмдэглээ. Улаан хубсаһатай Красноярскын хизаарай Александра Дмитриевагай шаагаад тудахадань, баяраа мэдүүлжэ һуугаа. “Энэл басаган һайн шаасалдана”, “Спортын мастерта кандидат эсэшоо...”, “Лумбунова харагшадай тоодо ороо гү?” гэжэ байгаад хөөрэхэдэнь, Буряадай харагшадай сэдьхэл хүмэрин байгаа һэн.

Финальна гонг болоһоной удаа Дулма Лумбунова илалта туйлааб гэжэ ойлгоһондоо, бэеэ барингүй шангаар бархиршоо. Уданшьегүй шүүгшэ Дулмын гар үргэжэ, чемпион болоһыень бултанда мэдүүлээ.

Дулма чемпионой бүһэ, алтан медаль, Хүндэлэлэй грамота болон 250 мянган түхэригэй шан абаад, рингһээ буухадань, ГТРК “Волга” теле-субагай сурбалжалагша хэдэн асуудалнуудые табиһан байна.

- Уулзалгын дүүрэхэдэнь лэ, түрүү һуурида гарааб гэжэ ойлгооб. Мүнөөдэр хүндэ тэмсээн болоо. Александра Дмитриеватай танилби, хайшан гээд шаасалдадаг бэ гэжэ мэдэдэг байгааб. Мүрысөөнэй үедэ уулзалгануудыень хаража, һоригшотоёо шэнжэлгэ хэһэн байнабди, - гэжэ нюдэнэйнгөө нулимса аршан, Дулма хөөрөө һэн.

Дулма хадаа хүндэ, 81 килограммһаа үлүү шэгнүүртэ амжалта туйлаа. Эндэ ринг дээрэ 11 хүн гараа. Буряадай тамиршан Сыктывкар, Челябинск, Абакан болон Красноярск хотонуудай түлөөлэгшэдые илажа шадаа.

Һүүлэй жэлнүүдтэ Ородой мүрысөөнүүдтэ тус шэгнүүртэ имагтал Буряадай тамиршад нэгэдэхи һууринуудые эзэлнэ. Нэн түрүүн, Кристина Ткачёвае нэрлэмээр. Тэрэ удаа дараалан гурба дахин чемпионой нэрэ зэргэдэ хүртөө. 2019 ондо дэлхэйн чемпионадта Кристина хүрэл медаль абаа һэн. Мүнөөшье жэл Ородой чемпионадта Кристинатай тэмсэхэ хүн олдохогүй гэжэ боксын мэргэжэлтэд багсаамжалһан байна. Харин хорото ковид үбшэнһөө боложо, энэ бодолынь бодотоор бэелээгүй.

Буряадай ургажа ябаа залуу тамиршан Юлия Арефьева хүндэ шэгнүүртэ шангай 3-дахи һуури эзэлээ.

- Кристинын үгы байхада, Юлия өөрыгөө харуулха ёһотой байгаа. Залуушуулай дунда мүрысөөнүүдтэ хабаадаха эрхэтэй Юлия шангай һуурида гарахадаа, өөртөө этигэлынь улам бата болоо. Тус амжалта Юлида хүсэ шадал үгэхэ гээд һанагдана, - гэжэ Буряадай Боксын федерациин хүтэлбэрилэгшэ Валерий Доржиев тэмдэглэнэ.

Найдал бии

2020 ондо үнгэргэгдэхэ Олимпиин наадануудта бэлэдхэлэй боложо байхада, Ородой суглуулагдамал команда бүридхэгдэжэ, шэгнүүр бүхэндэ хэдэн тамиршад шэлэгдээ. 69 килограммай шэгнүүртэ Дарима Сандакова оролсоһон байна. Теэд шэлэн абалгын түрүүшын мүрысөөндэ Дагестанай Саадат Далгатова ошохо гэжэ заагдаа һэн. Мүн тус мүрысөөнииньшье болюулагдаа, Олимпиин наадануудай болзоршье жэлээр хойшолуулагдаа.

Тиигэжэ олимпийскэ суглуулагдамал командын бүридэлдэ һэлгэлтэнүүд болохо гү гэжэ Ульяновск хотодо үнгэргэгдэһэн Ородой чемпионат харуулха байгаа.

Дарима Сандакова болон Саадат Далгатова хоёрой финалда уулзахадань, хэншье гайхаагүй. Элиста болон Тюмень хотонуудай түлөөлэгшэдые шүүжэ, Дарима һүүлшын уулзалгада хабаадаа.

Урда жэлнүүдтэ Дарима Саадат хоёр хэдэн дахин уулзаһан юм. Энэшье удаа Дагестанай түлөөлэгшэ Даримые дахин шүүжэ гараба. Иигэжэ мүнгэн медаль абаһан Буряадай тамиршан Ородой суглуулагдамал командын бүридэлдэ үлэбэ гээшэ.

75 килограммай шэгнүүртэ 3-дахи һуури эзэлһэн Елена Гапешина Ородой суглуулагдамал командын бүридэлдэ һуурияа баһа алдабагүй.

Мүрысөөнэй түгэсэхэдэ, ахамад һоригшо Иван Шидловский, тус чемпионадта хабаадажа шадаагүй түрүү тамиршадые орхихогүйбди гэжэ мэдүүлээ. Буряадай Людмила Воронцова, Наталья Шадрина, Кристина Ткачёва гэгшэд коронавирус үбшэнһөө боложо, Ульяновск ошоогүй һэн гээд һануулая.

- Аяар 7 түрүү тамиршаднай Ородой чемпионадта хабаадабагүй. Харин тэдэниие орхингүй, һорилгын хэмжээ ябуулгануудта заал һаа хабаадуулхабди. 2021 оной эхиндэ шэгнүүр бүхэндэ 8-8 эрхим басагадые суглуулжа, тусхай мүрысөө эмхидхэхэбди. Тиигээд лэ Олимпиадада шэлэн абалгын мүрысөөндэ хэн ошохоб гэжэ элирхэ, - гэжэ Иван Шидловский мэдүүлнэ.