​Һая спортын мастер болоһон Буряадай тамиршан дахинаа илалта туйлаба

Ноябриин 3-7 үдэрнүүдтэ үнгэргэгдэһэн тулалдаануудта Ородой 21 можо хизаарнуудай 100 гаран тамиршад хабаадалсаа.

Тула хотын ринг дээрэ Буряадай дүрбэн хүн гараа. Ганса Баир Батлаев шангай һуури эзэлжэ шадаһан байна. 52 килограмм хүрэтэр Орловско можын хоёр түлөөлэгшэдтэй уулзаа. Тэдэниие шүүжэ, нэгэдэхи һуури эзэлжэ, алтан медаль абаа.

Баир Батлаев октябриин эхиндэ Алас Дурна зүгэй федеральна тойрогой мүрысөөндэ түрүү һуури эзэлжэ, “Ородой спортын мастер” гэһэн хүндэтэ нэрэ зэргэдэ хүртөө һэн гээд һануулая.

Николай Харанахоев, Доржо Дахаев болон Олег Елизаров гэгшэд тус мүрысөөндэ хабаадажа, шангай һууринуудые эзэлжэ шадаагүй бшуу.

Мүнөө үедэ Буряадай тамиршад Ородой баруун зүгэй можо хизаарнуудта бэлэдхэлээ үргэлжэлүүлнэ. Ноябриин 27-до Оренбург хотодо Ородой чемпионат эхилхээр хараалагдана.