​Барилдаагаар уласхоорондын мүрысөөндэ Буряадаа суурхуулаа

“Poland Open” гэһэн барилдаагаар заншалта уласхоорондын мүрысөөндэ суута тамиршадай дунда Буряад орониие түлөөлдэг тамиршад шалгараа гэжэ Буряад Уласай спортын болон залуушуулай хэрэгүүдэй талаар яаманай хэблэлэй албан мэдээсэнэ.

Бүхы дэлхэй дээрэхи түрүү тамирша эхэнэрнүүд коронавирус үбшэнhөө боложо, үнинэй хибэс дээрэ гараагүй байһанаа, түрүүшынгээ мүрысөөндэ хабаадаба гээд хэлэлтэй. Шанга гэгшын тулалдаануудта Ородой басагад 14 медальда хүртөө, зургааниинь чемпион боложо тодороо.

Буряад Уласай түлөө барилдадаг чуваш угтай гурбан тамиршан Ородой суглуулагламал командын бүридэлдэ оруулагдажа, ялас гэмэ амжалта туйлаба.

57 килограммай шэгнүүртэ Вероника Чумикова финальна уулзалгада Венгри гүрэнэй Европын чемпион Эмесе Баркые 12:0 гэһэн тоотойгоор шүүжэ шадаа.

65 килограммай шэгнүүртэ Мария Кузнецова финал гаража, Молдави гүрэнэй Ирина Рингач гээшые 11:6 гэһэн тоотойгоор илажа, алтан медальда хүртөө.

72 килограммда гурбадахи шангай һуури Евгения Захарченко эзэлжэ шадаа.

2020 оной Ородой чемпион Ульяна Тукуренова дахинаа 62 килограммай шэгнүүртэ барилдаа. Тэрэ нэгэл уулзалга хэжэ шадаа. Кыргызстанай дэлхэйн чемпион Айсулуу Тыныбековатай ана-мана барилдабашье, шүүгдээ.

Тус мүрысөөнэй удаа Ородой суглуулагдамал командын гэшүүд дэлхэйн Кубокто хүртэхын түлөө мүрысөөндэ хабаадаха гэжэ бэлэдхэл хэжэ эхилбэ. Түрүүн Сербидэ дэлхэйн чемпионат үнгэрэгдэхэ гэжэ хараалагдажа байгаа. Ноябриин 10-да бүхэдэлхэйн барилдаанай нэгэдэмэлэй (UWW) шиидхэбэреэр дэлхэйн Кубок болохоор түсэблэгдөө.