​Эдир тамиршан Буряадаа амжалтатайгаар түлөөлнэ

Шэрээгэй теннисээр бүхэроссиин мүрысөөндэ ээлжээтэ амжалтаяа эдир тамиршан Анита Доржиева туйлаба. Буряад Уласай спортын болон залуушуулай хэрэгүүдэй яаманай мэдээсэһээр, тэрэ гурбан медальда хүртөө.

Шэрээгэй теннисээр бүхэроссиин мүрысөөн Новосибирскын можын Бёрдск хотодо эмхидхэгдээ. Илалтын 75 жэлэй ойн баярта зорюулагдаһан энэ хэмжээ ябуулга хабартаа болохо аад, сагайнь болзор хойшолуулагдаа бэлэй.

Басагадай дунда парна наадануудта Анита түрүүлжэ гараа. Буряадай тамиршан хубиин тоосоондо болон микст тулалдаануудта хоёрдохи һуури эзэлээ.

Мүнөө үедэ Ородой клубуудай дунда чемпионадта Анита бэлэдхэл хэжэ эхилээ. Тэрэ Олимпиин халаанай уласай спортын һургуулиин шаби гээд хэлэхэ хэрэгтэй.