​Буряадай эдир шатаршан Софья Унгаевагай ээлжээтэ амжалта

Ноябриин 10-да Владивосток хотодо Алас Дурна зүгэй федеральна тойрогой мүрысөөндэ хабаадагшад классическэ нааданда һүүлшынгээ уулзалгануудые үнгэргөө. Буряад Уласые эндэ оройдоол 8 шатаршан түлөөлөө гээд хэлэлтэй.

Жэл урда тус мүрысөөндэ Буряадай эдир шатаршад 21 медаль абажа, 8 хүниинь Ородой чемпионадай финальна шатада хабаадаха эрхэдэ хүртөө бэлэй. Теэд тэрэнь болюулагдаа. Тиимэһээ 2021 оной мүрысөөндэ тэдэ хабаадаха аргатай гэжэ бүхэроссиин федерацида мэдүүлээ.

Мүнөө жэлэй тулалдаануудта 11 наһа хүрөөдүй тамиршадай дунда Софья Унгаева 6,5 очкотойгоор мүрысөө түгэсэжэ, гурбадахи һуурида гараа. 8-8 очко абаһан Приморско хизаарай болон Саха-Яхад Уласай шатаршад түрүүлээ. Софья хадаа Инна Ивахиновагай ударидалга доро бэлэдхэл хэдэг юм.

Лев Сизов 17 наһа хүрөөдүйшүүлэй дунда 4-дэхи һуури эзэлээ. Табадахи һуурида Батор Жамбалов 15 наһатайшуулай дунда гараа. Тиимэһээ эдэ гурбан шатаршаднай 2021 оной Ородой чемпионадта хабаадаха эрхэдэ хүртэбэ гээшэ.