Вячеслав Дамдинцурунов: «Буряад Уласта энэ һайндэр 30 жэлдэ хүлеэгдээ»

Буряад Уласай спортын болон залуушуулай бодолгын талаар сайд Вячеcлав Дамдинцурунов улас дотор эхилһэн сүлөөтэ барилдаагаар Ородой Холбоото Уласай чемпионадта ерэһэн нэрэ солотой тамиршад болон саашадаа можо нютагтаа спортын энэ зүйл дэмжэхэ тухай хэлэбэ.  

Мүнөөдэр, мартын 11-дэ, Улаан-Үдэдэ Олиимпиин наадануудые угтуулан, сүлөөтэ барилдаагаар Ородой чемпионат эхилбэ. Ородой 41 можо нютагай суглуулагдамал команданууд мүрысөөндэ хабаадалсахаяа ерээ. Тамиршадай дунда уласхоорондын классай Ородой спортын 62 мастер, Ородой спортын габьяата 8 мастер уластамнай буугаа.

 - Бүхы тамиршад илалта туйлахаар бэлэн. Юундэб гэхэдэ, Токиодо болохо Олимпиин наадануудай урда Ород гүрэнэй барилдаашадай гол мүрысөөн болоно ха юм. Буряадай бүхэшүүл илалта туйлаха гэжэ бэеэ зэһэнхэй, харамтайнь гэхэдэ, манай залуу зарим барилдаашаднай бирагүйдэбэ. Манай түрүү барилдаашаднай һайнаар тулалдаха гэжэ һананаб. Энэ һайндэр Буряад Уласта 30 жэлдэ хүлеэгдээ, хүбүүднай өөрыгөө харуулха ёһотой, - гэжэ  Буряад Уласай спортын болон залуушуулай бодолгын талаар сайд Вячечлав Дамдинцурунов хэлэбэ.

Буряад Уласаа 39 барилдаашад түлөөлнэ. Һоригшод Балдан Цыжипов, Евгений Жербаев, Жаргал Дамдинов гэгшэдһээ илалта хүлеэнэ.  

Вячеслав Дамдинцуруновай хэлэһээр, Дагестанһаа гарбалтай барилдаашад буряадай тамиршадай гол тэмсэгшэд болоно. Дагестанай суглуулагдамал командада 70 барилдаашад.

Сүлөөтэ барилдаагаар Ородой чемпионат шэлэн абалгын шата болоно гээд һануулнабди. 57 кг, 86 кг хүрэтэр шэгнүүрнүүдтэ эрхим барилдаашад Ород гүрэниие Олимпиада түлөөлхэ эрхэдэ хүртэхэ юм.