​Буряадай харбаашад Агаһаа медальтай гэртээ бусаба

Үбэр Байгалай хизаарай Ага тосхондо һур харбалгаар мүрысөөндэ Буряадай тамиршад гурбан медаль абажа шадаа.

Тус мүрысөөн эдиршүүлэй дунда дэлхэйн абарга болоһон Аюр Абидуевай мүнхэ дурасхаалда зорюулагдаа. Тэрэ оройдоол 22 наһандаа наһа бараһан юм.

Нээлгын баяр ёһололдо Аюрай аба эжы Цыренжап Ульзытуевич ба Соелма Владмировна, Чингис хүбүүниинь уригдаһан байна.

Буряад болон Саха (Яхад) Уласуудай, Үбэр Байгалай хизаарай, Эрхүү можын 337 тамиршан түрүү һууриин түлөө тэмсээ.

18 наһа хүрөөдүй тамиршадай дунда Улаан-Үдэ хотын олимпиин халаанай спортын 9-дэхи һургуулиин шаби Эржена Галсанова шангай 3-дахи һуури эзэлээ. Блочно түхэлэй һур номшоор харбалгада Лхама Жабон мүнгэн медальда хүртөө.

Командна тоосоондо олимпиин халаанай спортын  9-дэхи һургуулиин суглуулагдамал команда 2-дохи һуурида гараа. Марина Агванова, Эржена Галсанова болон Алтана Жамбалова гэгшэд эндэ шалгараа.

Энэ мүрысөөгөөр үбэлэй хаһа түгэсэбэ гээшэ. Тамиршад мүнөө газаа холын зайда харбажа эхилхэнь.