​Хүдөөгэй спортын наадануудай үнгэргэгдэхэ болзор Буряадта элирбэ

Уласай хүдөөгэй спортын нааданууд 2021 ондо Хэжэнгэ аймагта июлиин 6-10 үдэрнүүдтэ үнгэргэгдэхэнь гэжэ шэнэ болзор элирүүлэгдэбэ. Тус нааданууд 2020 ондо эмхидхэгдэхэ байгаа һэн гээд һануулая.

Буряад Уласай спортын болон залуушуулай хэрэгүүдэй талаар яаманай сайд Вячеслав Дамдинцурунов һаяхана албанай хэрэгээр Хэжэнгын аймагаар ябахадаа, хэр бэлэдхэл хэгдээб гэжэ сэгнэбэ.

- Хэжэнгээрхид бэлэдхэлэй ехэ ажал ябуулһан байна. Тиигэбэшье, шиидхэгдээгүй зарим асуудалнууд гараадхина. Наадануудай эхилтэр, тэдэ усадхагдаха. Минии һанахада, Хэжэнгэ 90 процентээр тамиршадые угтахаар бэлэн, - гэжэ сайд мэдүүлээ.

Хэжэнгэ һууринай спортын томо комплексдо, хоёр һургуулинуудай болон Буряадай аграрна колледжын Хэжэнгын таһагай спортын танхимуудта, Бато Баяртуевай нэрэмжэтэ стадиондо, хүүгэдэй спортын һургуулиин байшанда, Эдэрмэг һууринай Дээдэ Хэжэнгын һургуулиин спортын танхимда, аймагай ипподром болон элүүржүүлгын “Хэжэнгэ” лагерьта 1200 гаран тамиршадые, һоригшодые, хүндэтэ айлшадые угтан абахаар хараалагдана.