813
Манай “Буряад үнэн” Хэблэлэй байшанай заншалта болоһон хүнгэн атлетикээр эстафетэ майн 10-да үнгэргэгдэхэнь гэжэ баяртай мэдээсэл дуулганабди. Энэ хэмжээ ябуулга түрэл сониноймнай 100 жэлэй ойдо зорюулагдан, 75-дахияа үнгэргэгдэнэ гээд хэлэлтэй.
Түүхын хуудаһануудые иража харахада, 1946 оной хабарһаа эхилжэ, Улаан-Үдэ хотодо хоёр эстафетэ болодог байһан юм. 1960-аад онуудта эдэ хоёр хэмжээ ябуулга нэгэдүүлэгдэжэ, ганса “Буряад үнэн” сониной эстафетэ гэжэ нэрлэгдээ.
- Шамбай солбон бэетэй, һонор һэргэлэн, согтой хүхюун ба өөһэдынгөө хүсэндэ этигэл найдабаритай эдир залуу тамиршад зунай һайхан сагые угтажа байна, - гэжэ “Буряад-Монголой үнэн” сониной хуудаһанууд дээрэ түрүүшын эстафетэнүүд тухай бэшэнэ.
1950 ондо гүйлдөөндэ 200 гаран командын бүридэлдэ 1400 гаран хүн хабаадалсаа гээд, баримтанууд гэршэлнэ. Зарим жэлнүүдтэ хабаадагшадай тоо 2 мянгаһаа үлүү бологшо һэн. Һүүлэй хэдэн арбаад жэлнүүдтэ энэ тоо тон бага болоһониинь харамтай. 2019 ондо болоһон һүүлшымнай эстафетэдэ 800 гаран хүн 80 командын бүридэлдэ оруулагдажа гүйлдөө. Урда жэлдэнь оройдоол 550 гаран хүн урилдаа.
“Буряад үнэн” сониной эстафетэдэ Буряадай бүхы түрүү тамиршад хабаадажа, удаадахи ехэ амжалтануудайнгаа эхи табиһан байна. Надежда Мироманова (Виноградова), Павел Яковлев, Наталья Соломинская, Татьяна Позднякова, Геннадий Темников болон бусад мэдээжэ хүнгэн атледүүд эндэ түрүүшынгээ алхамуудые хэһэн байна. Һүүлэй үедэ Буряадай хүнгэн атлетикын туг үндэр дээрэ үргэжэ ябаһан Николай Вербицкий, 2018 оной залуушуулай дунда Ородой чемпион Сергей Соловьёв, 2017 оной залуушуулай дунда Ородой чемпионадай хүрэл медаль абагша Анна Ксенофонтова гэгшэд энэ һайхан заншал үргэлжэлүүлээ. Тиимэһээ тус хэмжээ ябуулга хүн зондо хэрэгтэй, хашартай мүрысөөн бэшэ гээд һанагдана.
Энэшье удаа урилдаамнай Буряадай ниислэлэй үйлсөөр болохоор хараалагдана. 18 бүлэгтэ хабаадаһан тамиршад, спортдо дуратайшуул Соведүүдэй талмай дээрэһээ гүйлдэжэ эхилээд, Илалтын проспектээр харайлдаад, гэдэргээ бусаха.
Хүндэтэ тамиршадые Соведүүдэй талмай дээрэ майн 10-да үглөөнэй 10 час 30 минутада хүлеэн байнабди.
Эстафетэ эмхидхэгшэд: Буряад Уласай спортын болон залуушуулай хэрэгүүдэй талаар яаман, Спортын байшануудай хүтэлбэри, “Буряад үнэн” Хэблэлэй байшан, Буряад Уласай хүнгэн атлетикээр федераци.
Эбээн тэдхэгшэд: Ород гүрэнэй Федеральна суглаанай Федерациин зүблөөнэй гэшүүд Александр Георгиевич Варфоломеев, Вячеслав Владимирович Наговицын.
Эстафетын партнёр: Буряад Уласай Арадай Хуралай һунгамал Михаил Денисович Гергенов.
Автор: Бадма ЯКШЕЕВ
