​Буряадай барилдаашан Стальвира Оршуш абаргын нэрэ соло  дуудуулаа

Апрелиин 25-да түгэсэһэн Европын чемпионадта Ород гүрэнэй эхэнэрнүүдэй суглуулагдамал командын гэшүүд долоон медальда хүртэһэн байна. Буряадай барилдаашан Стальвира Оршуш абаргын нэрэ соло баһал дуудуулаа.

Түрэһэн үдэрэй баяр

Һонирхолтойнь гэхэдэ, Европын чемпионадта Стальвира гурбадахияа түрүүлжэ гараа. Мүнөөнэй амжалтань түрэһэн үдэртэнь тудаа.

- Үглөөгүүр Варшавада һэрихэдэмни, түрэл Буряадтамни үдэшэ боложо байгаа. Тиимэһээ бодоһоор амаршалгануудые абажа эхилээб. Намайе амаршалаагүй хүн үгы байгаа бшуу. Түрэл гаралнуудни, нүхэдни, манай Барилдаанай федераци, энэ мүрысөөндэ суг хамта ерэһэн басагад булта намда амжалта хүсэһэн байна. Иимэ һайхан үгэнүүдые шагнажа байхада, гоё даа, хүсэ шадал бэедэмни оруулһандал болоо. Түрэһэн үдэртөө шүүгдэхэ ёһогүй байшооб, - гэжэ Стальвира Оршуш диилэһэнэй удаа сурбалжалагшадта дуулгана.

Европын гурбадугаар абаргын хэлэһээр, бүхы наһандаа тэрэ ори ганса дахин түрэһэн үдэртөө хибэс дээрэ гараһан байгаа. Хэзээб даа Стальвира залуушуулай дунда Ород гүрэнэй чемпионой нэрэ зэргэдэ хүртөө. Мүнөө дахинаа илалта туйлажа, һайхан заншалаа үргэлжэлүүлбэ гэхэдэ, алдуу болохогүй.

- Үнинэй түрэһэн үдэрөө гэртээ угтаагүйб. Юуб гэхэдэ, эдэ үдэрнүүдтэ бидэ ходо һорилгын хэмжээ ябуулгануудта хабааданабди. Бэлэдхэлгын халаанай одоол халуун хаһа байдаг юм, - гэжэ Стальвира мэдүүлнэ.

Алдуунуудаа заһаа

Һаяхана мартын 19-20-ой үдэрнүүдтэ Будапешт хотодо Олимпиин наадануудта шэлэн абалгын мүрысөөн болоо һэн. Тэндэ Стальвира Оршуш шангай 3-дахи һуури эзэлбэшье, урдань табигдаһан зорилгодо хүрөөгүй. Оройдоол нэгэ һара үнгэрһэнэй удаа Стальвирые хибэс дээрэ танихаар бэшэ байба. Тэрэ оролдосотойгоор барилдажа, харагшадаа ехэтэ гайхуулаа.

- Бурханай табисуураар Будапештдэ шүүгдэхэ байгаа гүб даа. Бүхы алдуунуудаа уураг тархидаа нэгэтэ бэшэ эрьюулжэ, хаража үзөөд, хибэс дээрэ һоригшодтоёо бэелүүлхэ гэжэ оролдообди, - гэжэ нэтэрүү зантай Стальвира һанамжална.

Варшава хотодо Буряадай барилдаашан тиимэ бэлэхэнээр илалта туйлаагүй. Түрүүшын уулзалгада шүүгдэшэн алдаа - барилдаанай һүүлшын 10 секундын хугасаада тэрэ диилэжэ гараа. Мүн финалдашье хибэсэй эзэн болохо Роксана Засинтай хүндэ уулзалга болоо.

- Уулзалгануудайнгаа түгэсхэлдэ ехээр шүүгдэнэ гэжэ манай суглуулагдамал командын гэшүүдтэ нэгэтэ бэшэ барилдаанай мэргэжэлтэд, һоригшод хэлэдэг болонхой. Бишье шэлэн абалгын мүрысөөндэ иимэ алдуунуудые гаргааб. Харин мүнөө ушарнууд тад ондоогоор тохёолдоо. Өөрөө уулзалгануудай түгэсхэлдэ эдэбхитэйгээр барилдаһан байнаб. Түрүүшын барилдаанда оройдоол 10 секундын үлөөд байхада, илалта туйлааб. Финалай түрүүшын хахадта хоёр балл абаад, 2-дохи шатада Польшын тамиршанда намайе диилэхэ арга боломжо үгөөгүйб, - гэжэ Стальвира Оршуш барилдаагаа шүүмжэлнэ.

Хэниинь ошохоб?

Европын чемпионадта 53 килограммай шэгнүүртэ Красноярск хотын Ольга Хорошавцевае һоригшод хаража үзэһэн байна. Ольга баһа шадамар бэрхээр барилдажа, чемпион боложо тодороо.

Олимпиин наадануудта шэлэн абалгын һүүлшын шатада хэнииень абаашахаб гэжэ Ородой суглуулагдамал командын һоригшодой урда бэрхэшээлтэй асуудал гараадхиба. Тус мүрысөөн майн 8-9- эй үдэрнүүдтэ София хотодо үнгэргэгдэхөөр хараалагдана.

- Намтай адли Олимпиадада ошохо эрхэдэ хүртөөгүй олон барилдааша басагад Европын чемпионадта хабаадаа. Олонтойнь танилби, хибэс дээрэ оло дахин уулзаһан байхаб. Хэды тиигэбэшье нэгэ нюдөөрөө тэдэнэй барилдаа харааб. Юуб гэхэдэ, ехэ амжалтануудни үшөө урдамни. Тиимэһээ һоригшод намда дахинаа найдажа, һүүлшын шэлэн абалгын шатада 53 килограммда барилдуулха бэзэ. Хүсэ шадалтай болоод байһанаа мэдэрнэб, - гэжэ Стальвира Оршуш мэдүүлнэ.