​Һур харбалгаар Буряадта үнгэрхэ Ородой чемпионадта харагшад түлбэригүй орохо аргатай

Байгша оной августын 15-һаа 20 болотор Улаан-Үдэдэ һур харбалгаар Ородой чемпионат үнгэргэгдэхэ. Тус хэмжээ ябуулгада 17 можо нютагуудай 170 тамиршад хабаадана.

Коронавирусһаа һэргылһэн тарилга абаһан, ПЦР-тест гараһан Буряадай ажаһуугшад түлбэригүйгөөр хэмжээ ябуулгада орохо аргатай гэжэ эмхидхэлэй хороон дуулгана.

Һур харбалгаар мүрысөөндэ нэгэ доро 500 хүн орохо аргатай. Улаан-Үдын Түбэй стадиондо үнгэргэгдэхэ мүрысөөндэ һур харбалгын тамирай һургуулинууд уригдаха юм.

- Августын 14-дэ тамиршад Улаан-Үдэдэ бууһан байна, энэл үдэр мандатна комисси үнгэргэгдөө. Августын 15-да һур харбалгаар туршалганууд үнгэрхэ, августын 16-да нээлгын баяр ёһолол үнгэргэгдэжэ, мүрысөөн эхилхэ. Августын 19-дэ чемпионадай түгэсхэлэй шата үнгэргэгдэжэ, хаалгын баяр ёһолол эмхидхэхэ, - гэжэ Ородой Холбоото Уласай ахамад һоригшо Константин Эрдынеев хэлэбэ.