​Москва хотодо нютаг зоной эблэлнүүдэй спартакиадада Буряадай барилдаашад хабаадаа

Ород гүрэнэй ниислэл хотодо намартаа нютаг зоной эблэлнүүдэй спартакиада эмхидхэгдэдэг заншалтай. Тус хэмжээ ябуулга Москвагай үндэһэн бодолгын болон можо хоорондын харилсаануудай департаментын дэмжэлгээр эмхидхэгдэдэг.

Буряадай тамиршад энэ мүрысөөндэ шангай 11 һуури эзэлһэн байна. Бүхэ барилдаанда илагшадые греко-римскэ барилдаанай 2016 оной Олоимпиин чемпион Давид Чакветадзе амршалаа. 60 кг хүрэтэр шэгнүүртэ Жаргал Бунаев түрүүлээ, Бато Сультимов хоёрдохи һуури эзэлһэн байна. 70 кг хүрэтэр шэгнүүртэ Тывагай барилдаашан Куулар Белек нэгэдэхи һуури эзэлээ, 2-дохи, 3-дахи һууринуудта Данзанов Тимур Хубраков Алексей хоёр хүртөө. 80 кг хүрэтэ шэгнүүртэ Дугаров Зорикто эрхимлээ, 90 кг дээшэ шэгнүүртэ Элбэк Цыренов эгээл бүхэ байһанаа гэршэлээ.