Буряад Уласта бэлигтэй шатаршадые арадай һунгамалнууд амаршалба

14 наһа хүрөөдүй хүүгэдэй дунда Европын тулалдаанда мүнгэн медальда хүртэһэн Эрдэм Хубукшанов, эрэшүүлэй дунда командна урилдаанда Ород Уласай чемпион, түргэн шатараар Уласай чемпионадай мүнгэн медаль шүүжэ шадаһан Жамсаран Цыдыпов хоёр болоно.

Жамсаран Аюрович өөрөө һоригшоор ажалладаг, хүүгэдые һургадаг. Тэрэ мүнөө буряад шатаршад сооһоо Ород Уласай суглуулагдамал командын бүридэлдэ ороһон түрүүшын тамиршан болоно. Эдэ тамиршадые Ород Уласай тамирай габьяата ажал ябуулагша, Буряад Уласай габьяата һоригшо Иванов Тимур Георгиевич бэлдэһэн байна.

Түрүү тамиршадые, һоригшодые болон тэдэнэй гэртэхиниие Арадай Хуралай һунгамалнууд халуунаар амаршалжа, саашанхи харгыдань амжалта хүсэбэ.

- Танай туйлаһан амжалтанууд, хэжэ байһан ажал амаргүй хэрэгтэй, хүндэтэй гээшэ. Шатар наадаха хэрэгтэ нэгэ ондоохоноор, онсо маягтайгаар тархияа хүдэлгэхэ ёһотой. Хэдэн алхам урагшаа хараха аргатай байха ёһотой бшуу. Таниие хүмүүжүүлһэн багшанарта баяр хүргэнэбди, - гэжэ Арадай Хуралай түрүүлэгшэ Владимир Павлов амаршалаа.

Үнэхөөрөөшье, шатар наадахадаа, ухаан бодолоо түргэн гүйлгэхэ, тэсэмгэй байха ёһотой бшуу. Буряад Уласта шатаршадай федераци Арадай Хуралай һунгамал Инна Ивахинова ударидадаг юм. Тэрэ өөрөө бэрхэ шатаршан, мүнөө һунгамал болонхой, эдир тамиршадые хүмүүжүүлхэ ехэ ажал ябуулдаг.

- Арадай Хуралда сугтаа хүдэлдэг нүхэдтөө һайниие хүргэхэ байнаб. Һунгамал Батор Цыбиковай һайгаар шатараймнай һургуулиин байшанда заһабарилга хэгдээ. Леонид Белых, Валерий Доржиев, Аркадий Цыбиков гэгшэд амаргүй ехэ туһаламжа манай федерацида ходол хүргэжэ байдаг, - гэжэ һунгамал Инна Ивахинова тэмдэглээ.