​Барилдаанда дуратайшуул Буряадай тамиршан Евгений Жербаевые урмашуулаа

Сүлөөтэ барилдаагаар дэлхэйн тэмсээндэ хүрэл медальда хүртэжэ, түрэл арадаа баярлуулһанайнь түлөө нютагаархидынь Евгений Жербаевта мүнгэ суглуулжа бэлэглэбэ.

Буряадаймнай барилдааша хүбүүн Норвегиин Осло хотодо үнгэргэгдэһэн дэлхэйн чемпионадта оролсожо тэмсэхэдээ, туйлай ехэ амжалтада хүртөө. Һүүлшын иимэ амжалта аяар 10 жэлэй саада тээ барилдаашан Базар Базаргуруев асарһан юм. Тэрэ гэһэнһээ хойшо хэды оролдолго хэгдэбэшье, дэлхэйн урилдаанай шанда хэншье хүртөөгүй.

Хэдэн жэлэй туршада шанга һорилго хэжэ, энэ болотор ерэһэндэнь урмашуулха гээшэ тон зүб. Буряад Уласай Засагай газарһаа 2 таһалгатай гэр абаха хэрэгтэнь тусхай сертификат Евгений Жербаевта барюулагдаһан юм. Харин мүнөө барилдаанда дуратайшуул, Евгений Жербаевай үнэн нүхэд, нютагаархидынь, өөһэдөө мүнгэн бэлэг бариха гэжэ шиидээд, иимэ хэмжээ ябуулга үнгэргөө бшуу.

- 1,5 сая хахадһаа үлүү мүнгэн суглараа. Хүн зон шадаха зэргээрээ оролсоо, нэгэниинь 500 түхэриг, нүгөөдэнь 100 мянга түхэриг хүрэтэр мүнгэ үгэһэн байха юм, - гэжэ эмхидхэгшэд дуулгана.

Талаан бэлигтэй барилдаашан саашадаа бүришье ехэ амжалта туйлажа, аха дүү монгол арадаа баярлуулхал байха гэжэ найданабди!