Барилдаанай дүнгүүд

Улаан-Үдэ.  Декабриин 18- 20-ой үдэрнүүдтэ Буряадай ниислэлдэ суута Борис Дугданович Будаевай нэрэмжэтэ уласхоорондын мүрысөөн эмхидхэгдэхэнь. Тус хэмжээ ябуулгада 21 наһа хүрөөдүй залуушуул хабаадахаар хараалагдана. Борис Будаев ээлжээтэ мүрысөөгөө дуратай һоригшодоо, олондо мэдээжэ барилдаашадые бэлдэһэн Валерий Николаевич Ивановто зорюулна.

 Улаан-Үдэ.  Буряадаймнай залуушуул хойно хойноһоо хибэс дээрэ гараһан байна. Нэн түрүүн 21 наһа хүрөөдүй тамиршад өөһэдын наһанай бүлэгтэ чемпионуудые элирүүлээ. 96 хүн 10 шэгнүүртэ барилдаа. Баир Баяндуев, Ринчин Ринчинов, Евгений Доржиев, Игорь Упкоев, Сандан Гармаев, Аюр Цыренжапов, МаксимСудаков, Аюр Нимаев, Айдар Санжиев, Илья Жибалов гэгшэд Буряад Уласай чемпионууд болоо. Дээрэ нэрлэгдэһэн залуушуулай олонхинь 24 наһа хүрөөдүй тамиршадай дунда мүрысөөндэ шалгараа, шангай һууринуудые эзэлжэ шадаа. Эндэ 77 хүн барилдаа.

 

Саха (Яхад) Улас. Буряадай барилдаашан Буян Цыренов һүүлэй гурбан долоон хоногто Саха (Яхад) Уласай командатай хамта һорилгын хэмжээ ябуулгануудта хабаа[1]даһан байна. Хажуугаарнь тэрэ хоёр мүрысөөндэ хабаадалсаа. Якутск хотын нээмэл чемпионадта Буян Цыренов 74 килограммай шэгнүүртэ шангай 2-дохи һуури эзэлээ. Мэдээжэ барилдаашан Виктор Рассадинтай финалда уулзаад, диилдэшөө. Тус мүрысөөндэ Монголой тамиршад хоёр алтан, нэгэ мүнгэн медальнуудые абаа. Үнгэрһэн амаралтын үдэрнүүдтэ Саха-Яхадай барилдаанай түб болохо Чурапча хотодо уласай нээмэл мүрысөөн болоһон байна. Дэлхэйн абаргануудай нэрэ зэргэдэ хүртэһэн аха дүү Герман ба Александр Контоевуудой шангууд эндэ тараагдаа. 79 килограммай шэгнүүртэ Буян Цыренов түрүүлжэ гараа.

Эрхүү. 2012 оной Олимпиин наадануудта абарга болоһон Наталья Воробьевагай шангуудта хүртэхын түлөө мүрысөөндэ 100 эдир тамиршад хабаадаһан байна. Наталья Воробьева Эрхүү можын Тулун хотоһоо уг гарбалтай юм. Тиигэжэ тэрэ түрэл нютагтаа эдиршүүлые 7-дохиёо суглуулна гээд хэлэлтэй. 16 наһа хүрөөдүй барилдааша басагадай дунда Буряадай тамиршад долоон медалда хүртөө. Должон Цынгуева Аяна Цыренжапова хоёр түрүүлжэ гараа. 21 наһа хүрөөдүй залуушуулай дунда Буряадай тамиршад найман медаль шүүжэ шалгараа. Мунсэл Цыденова, Адиса Аюшеева болон Надежда Галдина гэгшэд 1-дэхи һууринуудые эзэлээ.