Шатараар Европодо амжалтанууд

Серби гүрэнэй Нови-Сад хотодо хүүгэдэй болон эдиршүүлэй дунда Европын чемпионат декабриин 26-31-эй үдэрнүүдтэ эмхидхэгдэбэ. Үнинэй нюур нюураараа уулзаагүй тамиршад олоор мүрысөөндэ суглараа. 29 гүрэнэй 500 гаран шатаршад наһанай 6 бүлэгтэ чемпионой нэрэ зэргын түлөө тэмсээ. Блиц-наадалгаар болон түргэн шатараар нааданууд эмхидхэгдээ. Классическа түхэлэй шатараар Европын чемпионадта Буряадай тамиршан Эрдэм Хубукшанов 2-дохи һуури эзэлээ гэжэ бэшээ һэмди. Нүхэрэйнгөө онлайн аргаар туйлаһан намарай амжалтые Шэнэ жэлэй һайндэрэй урдахана эдиршүүл үргэлжэлүүлжэ, буряад угсаата арад зоноо, бүхы ажаһуугшадаа баярлуулба гээшэ.

Түрүүшүүлэй тоодо

Мүрысөөнэй түрүүшын үдэрнүүдтэ түргэн шатараар шанга тулалдаанууд болоһон байна. Буряадаймнай гурбан наадагша ялас гэмэ амжалта туйлажа, хоёр алтан, нэгэ мүнгэн медаль абаа. 14 наһа хүрөөдүй басагадай дунда түрүүшын хоёр һуури Буряадай түлөөлэгшэд эзэлээ. Яна Жапова чемпион боложо тодороо. Сойжина Комиссарова мүнгэн медальда хүртэжэ, шангай 2-дохи һуури эзэлээ. Яна Жапова Үбэр Байгалай хизаарай Ага нютагай тамиршан юм. Аюша Долсоновой бэлигтэй шаби һүүлэй хэдэн жэлнүүдтэ Буряадай һоригшо Тимур Ивановой ударидалга доро бэлэдхэл хэжэ эхилээ. Агын гимназиин шаби шатартаа ехэ анхарал хандуулжа, һуралсалаа онлайн аргаар үргэлжэлүүлжэ эхилээ. Удангүй Яна түрүүшынгээ ехэ амжалтануудые туйлаа. 2021 ондо Яна Жапова түрүүн “ФИДЕ-гэй мастер”, удаань “Уласхоорондын мастер” гэһэн нэрэ зэргэнүүдтэ хүртөө. Мүнөө үедэ уласхоорондын гроссмейстерэй дабаан урдань үлэнхэй, энээндэ харгы нээжэ шадаад байна. 14 наһа хүрөөдүй хүбүүдэй дунда Тамерлан Чындыгыр бусадһаа һайн наада харуулжа, Европын чемпионой нэрэ зэргэдэ хүртөө. Тамерлан шатар нааданай үндэр орьёлдо хүрэхэеэ түрэл Тыва Уласһаа Улаан-Үдэ ерээ бшуу. Эхэнэрнүүдэй дунда уласхоорондын гроссмейстер Инна Ивахиновагай нэрэмжэтэ шатарай һургуулиин богоһо алхажа ороо бэлэй. “ФИДЕ-гэй мастер” гэһэн нэрэ зэргэтэй шатаршад Тыва Уласта һая болотор үгы байгаа. Тамерлан Чындыгыр 2021 ондо хүндэтэ нэрэ зэргэтэй болоод, нютагайнгаа түүхэдэ нэрэеэ алтан үзэгөөр бэшүүлбэ ха юм. Жэлэй түгэсхэлдэ Европын түрүүшүүлэй тоодо оролсобо.

Балканай одоной ялалзаан доро

 Блиц-нааданда Европын чемпионой нэрэ зэргэдэ Буряадай үндэһэтэнэй 1-дэхи лицей-интернат һургуулиин 7-дохи классай һурагша Номина Дармаева хүртэбэ. Тамерлан Чындыгыр Европын мүрысөөндэ хоёрдохи медаляа абаа, блиц-мүрысөөндэ тэрэ шангай 2-дохи һуури эзэлээ. Блиц-наадан нэгэ үдэрөөр эмхидхэгдэжэ түгэсөө гээд хэлэлтэй. 8 сагай туршада наадагша бүхэн аяар 18 уулзалга үнгэргөө. Тиимэһээ Буряад Уласай тамиршадай һайн дүн харуулһандань баярламаар. Номина Дармаева 14 наһа хүрөөдүй шатарша басагадай дунда мүрысөө. Тэрэ 14 очко абажа, бултанай урда гараа. Номина балшар бага ябахадаа, амжалтануудые туйлажа эхилһэн байна. Закаменск хотодо Роза Баировна Намжиловагай хүтэлбэри доро тэрэ һорилго хэжэ эхилээ һэн.

- Хүүгэдэй сэсэрлигэй шаби байгаад, Номина шатар наадажа һураа. Бүхы үхибүүдэй үдэртөө унтаха үедэ һорилгодонь абаашадаг һэмди. Эгээл тэрэ үедэ манай хүгшэн эжы эрхэ басагандаа Инна Ивахиновагай гэрэл зурагтай литэ бэлэглэһэн байна. Номина тон ехээр һонирхожо, зураг дээрэхи шатаршан тухай бүхыень хүгшэн эжыһээнь һуража абаа бэлэй. Таһалга соонь энэ литэ эгээл хүндэтэй, һайнаар харагдаха газарта үлгөөтэй байгша һэн. Удаань бүри оролдолготойгоор шатарайнгаа хэшээлнүүдтэ ябажа эхилээ, - гэжэ басаганай эжы Ирина Дармаева һонирхолтойгоор хөөрэнэ.

2015 ондо Дармаевтан гэр бүлөөрөө Улаан-Үдэ хото зөөжэ ерээ. Басаганайнгаа шатарайнь бэлиг улам мүлихэ зорилготой нютагһаа гаража ерэһэншье байжа болоо. Буряадай Үндэһэтэнэй 1-дэхи лицей-интернадта һурахаяа ороод, хүүгэдэй шатарай багша Евгений Васильевич Байновай ударидалга доро Номина бэлэдхэл хэжэ эхилээ. Удаань Инна Ивахиновагай шатарай һургуулида һорилгоёо үргэлжэлүүлһэн байна.

- Түхэреэн жэлэй хугасаада Номина Дармаева һайн дүнгүүдые харуулаа. Алас Дурна зүгэй федеральна тойрогой мүрысөөндэ өөрын наһанай бүлэгтэ хоёр дахин түрүүлээ. Ехэшүүлэй дунда Буряад Уластаа, Алас Дурна тойрогто шалгараа. Нови-Садта үнгэргэгдэһэн Европын чемпионадта Номина 14 наһа хүрөөдүй шатаршадай дунда эгээл залууниинь байшоо. Хэды тиигэбэшье эгээл шанга тамиршадые илажа гараа, - гэжэ һоригшо Инна Саяновна Ивахинова хөөрэнэ.

Шатарай түүхэдэ Номина Дармаева орохоороо оробо гээшэ. Юуб гэхэдэ, Буряад Уласай шатаршад сооһоо ганса Инна Ивахинова Европын чемпионой нэрэ зэргэдэ урдань хүртэһэн намтартай байгаа. Номина иимэ үндэр амжалта туйлаһан оройдоол 2-дохи тамиршан болоно бшуу. Һонирхолтойнь гэхэдэ, Буряадаймнай шатаршадта эгээл баяртай ушарнууд Балканай дэбисхэр дээрэ тохёолдоһон байна. Өөрөө Инна Ивахинова холын 2007 ондо хоёрдохиёо Европын чемпион болоходоо, Черногори гүрэнэй Герцог-Нови хотодо наадаа бэлэй. 2019-2021 онуудта шатаршад Жамсаран Цыдыпов, Яна Жапова, Эрдэм Хубукшанов уласхоорондын нэрэ зэргэнүүдтэ хүртэхын түлөө алхамуудаа мүн лэ Сербидэ хэһэн байнад.